नेकपाका अध्यक्ष पुष्पकमल दाहाल प्रचण्डका ठेकेदार घरबेटीले समयमा काम नगरेपछि भक्तपुरमा वासिन्दाले विरोधको भिन्न शैली अपनाएका छन् । प्रचण्डका घरबेटी समेत रहेका सैलुङ कन्स्ट्रक्सनका प्रमुख शारदाप्रसाद अधिकारीले सडकको ठेक्का समयमा पुरा नगरेपछि स्थानीयले भिन्न स्वरुपमा यसको बिरोध गरेका छन् ।
बिरोध अन्तर्गत स्थानीयले अधिकारीको फोटो छापेर पोलमा, सडकमा, सार्वजनिक तथा निजि गाडीमा टासेका छन् । फोटोमा 'सडकको ठेकेदार, कालोपत्रे छिटो ग़र, 'शारदा अधिकारी, नगरकोट बाटोको ठेकेदार' लगायतका नारा लेखिएका छन् । केहि ब्यानरमा बाँदर र कुकुरको फोटो पनि प्रयोग गरिएको छन् । समयमा नै सडक कालोपत्रे नभएपछि स्थानीयले सडक छिटो निर्माण गर्नको लागि दबाब दिन यस्तो शैली अपनाएको बताएका छन् ।
भक्तपुरको कमलविनायकदेखि नगरकोटको भट्टेडाँडासम्मको सडक कालोपत्रेको ठेक्का अधिकारीले पाएका थिए । १५.६६० किलोमिटरको सडक स्तरोन्नतिका लागि उनीसँग २०७१ असार २ गते सम्झौता भएको थियो। ३१ करोड ५२ लाख ९२ हजार २ सय २० रुपैयाँमा भएको सम्झौता अनुसार यो सडक २०७३ असार ४ गते सम्ममा निर्माण सम्पन्न गरी बुझाउनुपर्ने थियो। तर कम्पनीले पटकपटक म्याद थप गर्दै आएको छ।
उपत्यकाको प्रमुख पर्यटकीय गन्तव्यको रूपमा परिचित नगरकोट सडक नबनेपछि पर्यटक र स्थानीयले दैनिक सास्ती खेपिरहेका छन्।