सिरहाको लहानबाट अपहरण भएको भनिएको नेपाल आयल निगमको ट्यांकर प्रहरीले फेला पारेको छ । मंगलबार साँझबाट हराएको उक्त ट्यांकर धनुषाको क्षिरेश्वरनाथ नगरपालिका–१ रमदैयामाबाट फेला पारिएको प्रहरीले जनाएको छ ।
प्रदेश नं. २ का प्रहरी प्रमुख डीआईजी प्रद्युम्न कार्कीका अनुसार ढल्केबरबाट १० किलोमिटर दक्षिणमा मंगलबार राति नै ट्यांकर भेटिएको हो । २० हजार लिटर डिजेल बोकेको भएपनि अहिले ट्यांकरमा तेल खन्याइएको छ । तेल कहाँ खन्याइयो भन्ने खुलेको छैन ।
बाराको अमलेखगंजस्थित निगमको डिपोबाट डिजेल भरेर प्रदेश १ को राजधानी विराटनगर जाने क्रममा ना४ख ४१६३ नम्बरको टयांकर हराएको थियो । प्रहरीले टयांकरका चालक रामदेव यादव र सह–चालक उमेश यादवलाई नियन्त्रणमा लिएको छ ।
निगमले पनि घटनाबारे छानबिन गर्न इञ्जिनियर अशोक साहको संयोजकत्वमा ४ सदस्यीय छानबिन टोली गठन गरेको छ ।