नेपालका लागि भारतीय राजदूत मञ्जिव सिंह पुरीको कार्यकाल सकिएको छ । राजदूत पुरीले आइतबार परराष्ट्रमन्त्री प्रदीप ज्ञवालीलाई भेटेर बिदाई भेट गरिसकेका छन् । योसँगै अब भारतले राजदूतको रुपमा कसलाई पठाउँला भन्ने चर्चा सुरु भएको छ ।
सन् २०१७ को मार्च २५ मा नेपालको लागि भारतको राजदूत बनेर आएका पुरीको कार्यकाल यही डिसेम्बर ३१ बाट सकिँदैछ । उनी पौष १५ गते स्वदेश फर्कने छन् । त्यसअघि उनले पौष १ गते बिदाई भोजको पनि आयोजना गर्ने भएका छन् ।
को आउला नयाँ राजदूत ?
पुरीको कार्यकाल सकिन लागेसँगै नयाँ दिल्लीमा नेपालमा कसलाई राजदूत बनाएर पठाउने भन्नेबारे बहस सुरु भएको छ । दिल्ली स्रोतले जनाए अनुसार हाल सिंगापुरका लागि भारतका हाइकमिसनर जाभेद अस्रफ नेपालको लागि राजदूत बनेर आउने सम्भावना छ । उनीसँगै नेपालमा भएको २०६२–६३ को आन्दोलनका बेला दूतावासमा प्रेस एण्ड कल्चर सचिवको रुपमा काम गरेका गोपाल बागले र सो भन्दा पनि अघि दूतावासमा प्रेस एण्ड कल्चर रहेका अखिलेश मिश्रको पनि सम्भावना बलियो छ ।
यी सम्भावित नाम बाहेक अन्यलाई पनि भारतले राजदूतको रुपमा पठाउन सक्ने छ । तर यसबारे भारतले हालसम्म औपचारिक जानकारी पठाईसकेको छैन ।
