राष्ट्रिय चिकित्सा शिक्षा आयोगका उपाध्यक्ष श्रीकृष्ण गिरीविरुद्ध सम्पत्ति शुद्धीकरण र अख्तियार दुरुपयोग अनुसन्धान आयोगमा उजुरी परेको छ । गिरीले अकुत सम्पत्ति आर्जन गरेको भन्दै झापास्थित बिएण्ड सी मेडिकल कलेजका संस्थापक दुर्गाप्रसाद प्रसाईंले उनीविरुद्ध उजुरी दिएका हुन् ।
गिरीले चिकित्सा विज्ञान राष्ट्रिय प्रतिष्ठान वीर अस्पतालको शिक्षाध्यक्ष रहँदा, स्वास्थ्य सेवा बीमा बोर्डमा कार्यकारी निर्देशक रहँदा र हाल आयोगको उपाध्यक्ष रहँदा घुस नलिई कुनै काम नै नगरेको दाबी सहित प्रसाईले उजुरी दिएका हुन् । प्रसाईंले गिरीको सम्पूर्ण सम्पत्ति जफत गर्न समेत माग गरेका छन् ।
प्रसाईले यसअघि एमबिबिएस कार्यक्रम सञ्चालनको सम्बन्धनको सिफारिस निवेदन दिँदा गिरीले २० करोड रुपैयाँ घुस मागेको दाबी गरेका थिए । प्रसाई तिनै व्यक्ति हुन्, जो एकताका प्रधानमन्त्री केपी शर्मा ओली र नेकपाका अध्यक्ष पुष्पकमल दाहाल प्रचण्डलाई मार्सी चामलको भात खुवाएर सामाजिक सञ्जालमा भाइरल बनेका थिए ।
