गण्डकी प्रदेश सभाका सांसद दिपक मनाङेविरुद्ध मुद्दा दर्ता भएको छ । अखिल नेपाल फुटबल संघ (एन्फा) कास्कीका अध्यक्ष मिलन गुरुङले मनाङेविरुद्ध जिल्ला प्रहरी कार्यालय कास्कीमा मुद्दा दर्ता गरेका हुन् ।
आफुलाई सार्वजनिक स्थलमै झापड हानेको भन्दै गुरुङले 'अभद्र व्यबहार तथा कुटपिट ' मुद्दा दर्ता गरेका हुन्। पोखराको भण्ढारढिकमा मंगलबारदेखि सुरु भएको मुख्यमन्त्री कप फुटबल प्रतियोगिता उद्घाटनको तयारी भइरहेका बेला मनाङ्गेले गुरुङमाथि कुटपिट गरेका थिए ।
कास्की प्रहरी प्रमुख प्रहरी उपरिक्षक (एसपी) दानबहादुर कार्कीले मुद्दा दर्ता भएको जानकारी दिदै कानुन अनुसार प्रर्क्रिया अगाडी बढाउने बताएका छन् । प्रहरी स्रोतका अनुसार बिहिबार जिल्ला प्रशासन कार्यालय कास्कीबाट पक्राउ अनुमति लिएर गुरुङलाई पक्राउ गर्ने अनुसन्धान गर्ने तयारी भएको छ । प्रदेश सभा चलिरहेकोले प्रदेश सभाका सभामुखलाई जानकारी दिएर उनलाई पक्राउ गरिने स्रोतले जनाएको छ।
