बिजपाटी सम्बाददाता     Apr 04, 2020 | 05:18:34 PM


tansen

बुटवलमा रहेको कोरोना विशेष अस्पतालमा आइसीयू वेड थप गरिने भएको हो । बुटवल उपमहानगरपालिका र लुम्बिनी प्रादेशिक अस्पतालको सहकार्यमा बुटवल धागो कारखानाको खाली भवनमा सञ्चालनमा रहेको कोरोना विशेष आइसोलेसन अस्पतालमा १० वटा आइसीयू वेड थप गर्ने तयारी अन्तिम चरणमा पुगेको हो ।

त्यहाँ गौतम बुद्ध सामुदायिक मुटु अस्पतालले प्राविधिक सहयोग र सहकार्य गरिरहेको प्रादेशिक अस्पतालका अध्यक्ष तथा कोरोना विशेष अस्पताल सञ्चालन एवम् समन्वय कार्यदलका सहसंयोजक सूर्यबहादुर भट्टराईले बताए। उनले दुई दिन भित्रमा सञ्चालनमा ल्याउने गरि काम भइरहेको बताए ।

उता बुटवल उपमहानगरपालिकाले वडा नम्बर १२ को तामनगरमा रहेको कोरिया नेपाल इन्ष्टिच्युट अफ टेक्नोलोजी कलेजको भवनमा ५० वेडको व्यवस्थित क्वारेन्टाइन निर्माण गरेको छ । भोजनालय, आवास तथा शौचालय र ज्वरो क्लिनिक सहितको प्राथमिक स्वास्थ्य सेवासमेत उपलब्ध गराउने गरि क्वारेन्टाइन निर्माण गरिएको वडा अध्यक्ष दुर्गा सुवेदीले बताए ।

बुटवलका विभिन्न स्थानमा फिवर क्लिनिक सञ्चालनमा रहेका छन् । जहाँ शुक्रबार मात्रै करिब ६१ जनाले परीक्षण गराएको स्वास्थ्य शाखाका अधिकृत कुन्दनकुमार सिंहले बताए । सहरी स्वास्थ्य प्रवर्द्धन केन्द्रहरुमा शनिबार पनि फिवर क्लिनिक सञ्चालन गर्ने तयारी भइरहेको सिंहले बताए।

Share your thoughts!

बिजपाटी सम्बाददाता

नेपालको आर्थिक अनलाइन पत्रिका