संघीय संसदको बजेट अधिवेशन सुरु हुनु अगाडी सबै सांसदको कोरोना परिक्षण गरिएको छ । आज बिहिबार बिहानैबाट राष्ट्रिय सभा तथा प्रतिनिधिसभाका सांसदहरुको कोरोना परिक्षणको लागि स्वाब संकलन गरिएको हो । साथै संसद भवनका कर्मचारी तथा मर्यादापालको पनि स्वाब संकलन गरिएको छ ।
त्यस्तै राष्ट्रिय सभाको बैठकमा आउँनको लागि आचारसंहिता पनि जारि गरिएको छ । राष्ट्रिय सभाका अध्यक्षको अध्यक्षतामा आज बसेको राष्ट्रिय सभा कार्यव्यबस्था परामर्श समितिको बैठकले आचारसंहिता तोकको हो ।
यस्ता छन् राष्ट्रिय सभा बैठक हुँदा पालना गर्नु पर्ने नियम:
- विश्व स्वास्थ्य संगठनले तोकेका सबै मापदण्डलाई पालना गर्दै एक मिटरको दूरी कायम गरेर दुई सिट छोडेर बस्ने व्यवस्था मिलाउने।
- राष्ट्रिय सभा बैठक कक्षमा अधिवेशन अवधिभर माननीय सदस्य ज्यूहरु एउटै सिटमा बस्ने।
- सम्माननीय प्रधानमन्त्री, माननीय मन्त्री तथा राष्ट्रिय सभा दलको नेताबाहेक अन्य माननीय सदस्यहरुले आम रुपमा रोष्टम प्रयोग नगर्ने र आफू बसेको सिटमा रहेको माइकको प्रयोग गर्ने। सामान्य अवस्थामा विधेयकको सिद्धान्त माथिको छलफमा सबै माननीय ज्यू ले रोष्टमको प्रयोग गर्ने प्रचल रहि आएको थियो।
- संसद भवनमा प्रवेश गर्दा र फर्कँदा फरक ढोकाको प्रयोग गर्ने ।
- क्यान्टिन र सभाहल बाहिर पनि अनावश्यक भीड नगर्ने तथा दूरी कायम गर्ने।
- संसद भवनलाई बैठक अगाडि स्यानिटाइज तथा अन्य सरसफाईमा विशेष ध्यान दिने ।
- दर्शक दिर्घामा कसैलाई पनि प्रवेश गर्न नदिइने।
- मिडियालाई आम रुपमा सचिवालयले फोटो उपलब्ध गराउने तथा फोटो खिच्न भीड नहुनेगरी व्यवस्थापन गर्ने।
- त्यसैगरी स्वास्थ्य सेवा विभागको विज्ञ टोलीले COVID-19 रोग संक्रमणको सम्भावित जोखिम रोकथाम गर्नेगरी संसद भवनको स्थलगत अनुगमन पश्चात तयार पारेको सुझाव प्रतिवेदनमा उल्लेखित आचारसंहिताको पालना गर्ने।
यस्तो छ आचारसंहिता:
- सबै सहभागीहरुले बैठक कक्ष प्रवेश गर्दा अनिवार्य रुपमा साबुन पानीले हात धुनु पर्ने।
-मेडिकल मास्कको प्रयोग बैठक अवधीभर सबैले अनिवार्य रुपमा गर्नुपर्ने ।
- सबै सहभागीहरुले बैठक समयमा भौतिक दूरीको पालना गरि तोकिएको कुर्सीमा मात्र बस्नु पर्ने।
- सकेसम्म समूहगत छलफलन नगर्ने, यदी गर्नै परेको अवस्थामा भौतिक दूरीको अनिवार्य पालना गर्नुपर्ने ।
-आफूलाई स्वास्थ्य सम्बन्धि कुनै पनि समस्या (ज्वोरो, खोकी, थकान, शरिर दुखाई आदी।) देखा परेमा तुरुन्त स्वास्थ्यकर्मीलाई खबर गर्नुपर्ने।
- बैठक हलबाट बाहिर निस्कनु परेमा पुन: प्रवेश गर्दा साबुन पानी वा ह्याण्ड स्यानिटाइजरको प्रयोग अनिवार्य गर्नुपर्ने।
- बैठक अवधीभर घरमा गई स्वयम् एकान्तवासको नियमहरुको पालना गर्नु पर्ने।
आगामी बजेट अधिवेशन भोलि वैशाख २६ गतेदेखि सुरु हुदै छ। बजेट अधिवेशनको पहिलो बैठक दिउँसो ४ बजे बस्ने छ । सरकारले हरेक वर्ष जेठ १५ गते आगामी वर्षको बजेट सार्वजनिक गर्नु पर्ने संवैधानिक व्यवस्था छ । त्यस अगाडी सरकारले नीति तथा कार्यक्रम समेत सार्वजनिक गर्नु पर्छ । बजेट पेश हुनुभन्दा १५ दिन अगाडि आगामी आर्थिक वर्षको नीति तथा कार्यक्रम पारित गरिसक्नुपर्ने व्यवस्था प्रतिनिधि सभा नियमावलीको नियम १४२ मा छ ।
