लगानी बोर्डमा गरिएको नियुक्ति बिरुद्द मुद्दा दायर भएको छ । बोर्डको प्रमुख कार्यकारी अधिकृतमा सुशील भट्टको नियुक्ति कानुनसम्मत नभएको जिकिर गर्दै नियुक्ति बदर गर्न माग गर्दै पाटन उच्च अदालतमा रिट दायर भएको हो।
अधिवक्ता जयबहादुर भुजेलले विभिन्न परियोजनाहरु बीचैमा अलपत्र र जोखिममा पार्ने कार्यमा संलग्न व्यक्तिलाई लगानी बोर्डको सीईओ नियुक्त गर्नु गैरकानुनी रहेको जिकिर गर्दै रिट दायर गरेका हुन् । उनले उक्त नियुक्ति सार्वजनिक निजी साझेदारी लगानी ऐन २०७५ को मक्सद एवं भावना विपरीत भएको प्रष्ट भएकोले यसलाई बदर गर्न माग गरेका छन् ।
अधिवक्ता भुजेलले नियुक्ति समबन्धि निर्णय कार्यान्वयन नगर्न नगराउन अन्तरिम आदेश जारी गर्न माग गरेका छन् । निवेदनमा नेपाल सरकार, मन्त्रिपरिषद्, लगानी बोर्ड, लगानी कोर्डको प्रमुख कार्यकारी अधिकृत नियुक्तिका लागि सिफारिस समिति र सुशील भट्टलाई प्रतिवादी बनाइएको छ ।
मुद्दाको प्रारम्भिक सुनुवाईका लागि सोमबार बिहान १० बजेको लागि पेशी तोकिएको छ ।
