काठमाडौँ महानगरको उपभोक्ता हित संरक्षण समितिले सोमबार बिहान कालीमाटी तरकारी बजार छेउमा रहेको माछा पसलको अनुगमन गरेको छ । अनुगमका लागि महानगरको टोली पुगेको खबर पाउँनासाथ धेरै माछा व्यापारीहरु पसल छोडेर भागेका थिए ।
२६ माछा पसलहरु रहेको कालीमाटीमा अनुगमन टोली पुगेपछि १५ व्यापारीहरु पसल छोडेर भागेको महानगरले जनाएको छ । अनुगमन टोली बजारमा पुगेर फलफुल बजारतर्फबाट माछा पसलको अनुगमन थालेपछि मुल ढोकातर्फका १५ वटा पसलका व्यापारीले सटर तानेर भागेका थिए ।
ढोका छेउको एक माछा पसलमा सडेको माछा भेटेपछि उक्त स्थानमा महानगरको टोली रोकिदा अरु केही व्यापारीले सटरमा चाबी लगाएको तथा केहीले यतिकै छोडेर भागेको थिए । अनुगमनका क्रममा धेरै पसलमा खरिद तथा बिक्री बिल नभएको पाईएको महानगरको पशु सेवा बिभागले जनाएको छ । खरिद बिल नहुँदा माछा कहिले ल्याईएको समेत थाहा हुन नसकेको महानगरले जनाएको छ ।
खरिद तथा बिक्री बिल नराख्ने, सडेका माछाको बिक्री गर्ने गरेर कानून नमान्ने व्यापारीलाई कारवाही गर्न समिति तयार भएको माछा बजार समितिका अध्यक्ष बीरेन्द्रकुमार यादव बताउँछन् ।