लामो समयदेखि रोकिएको इ–पासपोर्ट छपाईको टुङ्गो लागेको छ । राहदानी विभागले विद्युतीय राहादानी (इ–पासपोर्ट) छपाइको लागि तेस्रो पटक आह्वान गरेको अन्तराष्ट्रिय टेन्डर मार्फत फान्सेली कम्पनीले जिम्मा पाएको हो ।
दुई पटक सम्म टेन्डर आह्वान गर्दा प्रक्रिया नपुगेको भन्दै स्थगीत भएको छपाईको जिम्मा फान्सेली कम्पनी आइडिइएमआइए आइडेन्टी एन्ड सेक्युरेटी फ्रान्स (एसएएस) लाई दिने निर्णय भएको छ । छुटसहित २ करोड ११ लाख डलरमा २० थान इ–पासपोर्ट छपाईका लागि विभागले बुधबार लेटर अफ इन्टेन्ड जारी गरेर एसएएसलाईलाई छपाइको जिम्मा दिएको हो ।
विभागले पहिलो पटक २०७६ भदौमा ईपासपोर्ट छपाइका लागि ग्लोबल टेन्डरको आह्वान गरेको थियो। उक्त आह्वानमा १९ वटा कम्पनीको प्रस्ताव परेतापनि अन्तिम चरणमा रद्द गरिएको थियो । यसैगरी दोस्रो टेन्डर गत फागुन १९ गते गरेकोमा ४ कम्पनीले प्रस्ताव गरेका थिए ।
दोस्रो टेन्डरमा आवेदन दिएका कुनै पनि कम्पनीको स्पेसिफिकेसन पूरा नगरेको भन्दै टेन्डर रद्द गरिएको थियो। विभागले तेस्रो टेन्डर असोज ८ गते आह्वान गरेको थियो ।