कोरोना बिरुद्दको खोप उत्पादन गरिरहेको एक चिनियाँ कम्पनीले आगामी डिसेम्बर महिना भित्र खोप बजारमा आउँने जनाएको छ। हाल खोपको तेस्रो चरणको परिक्षण भईरहेको र परिक्षण लगत्तै खोप बजारीकरणको कार्य सुरु हुने जनाईएको हो ।
चिनियाँ राष्ट्रिय फर्मासुटिकल्सका अध्यक्ष लिउ जिंगझेनले यसबारे जानकारी दिएको गुवाङमिङ डेलीले जनाएको छ । उनका अनुसार यो खोपको मूल्य धेरै महँगो हुने छैन । उनले खोप २ पटक दिंदा १ हजार युवान भन्दा कम अर्थात् १४४ डलर भन्दा कम लाग्ने बताएका हुन् ।
उनले चीनका सबैले खोप खोप लगाउनु नपर्ने भएपनि जनघनत्व बढी भएका शहरका बासिन्दाले यो खोप लगाउनु उपुक्त हुने बताए । उनले स्वास्थ्यकर्मी, र विद्यार्थीले यो खोप निशुल्क पाउँन सक्ने समेत बताएका छन् । अन्यले भने आफ्नै खर्चमा खोप लगाउनु पर्ने छ । कोरोना बिरुद्दको खोप पनि चीनको राष्ट्रिय खोप कार्यक्रममा समावेश भएको खण्डमा भने सबै चिनियाँले निशुल्क खोप पाउने बताईएको छ । चीनको राष्ट्रिय खोप कार्यक्रममा पोलियो, हेपटाइटिस लगायत विभिन्न १५ वटा रोग बिरुद्द १४ वटा खोप प्रदान गरिने उल्लेख छ ।
चीनमा बनेको अन्य दुई खोपको पनि युएईमा तेस्रो चरणको परिक्षण भईरहेको ग्लोबल टाइम्सले जनाएको छ । चिनियाँ राष्ट्रिय फर्मासुटिकल्सका अध्यक्ष लिउ स्वयंले समेत यो खोप लगाएको र कुनै खराब असर नदेखिएको बताएका छन् ।
ग्लोबल टाइम्सका अनुसार बेइजिंगमा रहेको एउटा कम्पनीसँग वार्षिक १२ करोड मात्र खोप उत्पादन गर्न सक्ने क्षमता छ । त्यस कम्पनीले सुरक्षा निरीक्षण समेत गराईसकेको छ । त्यस्तै उहानमा रहेको अर्को कम्पनीसंग वार्षिक १० करोड मात्र खोप उत्पादन गर्न सक्ने क्षमता छ ।
