प्रधानमन्त्री केपी शर्मा ओलीले आगामी आर्थिक वर्षको बजेट अध्यादेशबाट आउने बताएका छन् । आइतबार पत्रकारहरुसंग अन्तरक्रिया गर्दै उनले संसद नभएकोले अध्यादेश बाट नै बजेट आउने बताएका हुन् । एउटा औपचारिक कार्यक्रम गरेर बजेट वाचन गरिने उनले बताए ।
आफुले घाेषणा गरेका कार्यक्रम कार्यान्वयन हुने गरी बजेट आउने र कोभिडविरुद्धको लडाइँमा बजेट केन्द्रित हुने उनको भनाई थियो ।
जेठ १५ गते नै बजेट ल्याउनु पर्ने संवैधानिक ब्यबस्थाले गर्दा अध्यादेशबाट नै बजेट ल्याउनु पर्ने बाध्यता आई परेको हो । त्यस्तै नीति तथा कार्यक्रम पनि अध्यादेशबाट नै आउने छ ।
यस अघि आर्थिक वर्ष ७०/७१ को बजेट पनि अध्यादेशबाट ल्याईएको थियो । त्यससमय संविधान बनाउन नसकी संविधानसभा बिघटन भएको थियो । तत्कालीन प्रधानन्यायाधीश खिलराज रेग्मीको नेतृत्वमा चुनाव गराउन चुनावी मन्त्रिपरिषद् गठन भएको थियो । पूर्व सचिव शंकर कोइराला अर्थमन्त्री थिए । राम वरण यादव राष्ट्रपति थिए । मन्त्रिपरिषद्को सिफारिसमा राष्ट्रपति यादवले बजेट अध्यादेशलाई स्वीकृति दिएका थिए ।
२०६९. २०६७, २०६२, २०६१, २०६०, २०५९, २०५२ मा पनि अध्यादेशबाट बजेट आएको थियो ।
