कर्मचारी सञ्चय कोषले सबै सञ्चयकर्ताको स्वास्थ्य बिमा गरिदिने भएको छ । आगामी मंसिर १ गतेदेखि लागू हुने गरी कोषले ६ लाखभन्दा बढी सञ्चयकर्ताको कूल ११ लाखको बिमा गर्ने भएको हो ।
कोषले जटिल रोगको उपचारका लागि १० लाख र सामान्य उपचारको लागि १ लाख रुपैयाँको स्वास्थ्य बिमा गर्ने लागेको हो । स्वास्थ्य बिमा योगदानमा आधारित नभइ सबै सञ्चयकर्ताको एकमुष्ठ भएको कोषका प्रशासक तुलसीप्रसाद गौतमले जानकारी दिए ।
सञ्चयकर्ता बिरामी भई अस्पताल भर्ना भएर उपचार गर्दा १ लाख रुपैयाँ र सरकारले जटिल रोग भनि तोकेका ९ प्रकारका रोग लागेमा १० लाख रुपैयाँसम्म उपचार खर्च बिमा वापत पाउनेछन् । कोषले सञ्चयकर्ताको स्वास्थ्य बिमाको लागि वार्षिक ३० करोड खर्च गर्ने भएको छ ।
कोषले २०७३ देखि नै स्वास्थ्य बिमा कार्यक्रम लागू गर्ने तयारी थालेको थियो ।