किसानको बक्यौता रकम भुक्तानी नगर्ने चिनी उद्योगीलाई तत्काल कानुनी कारबाहीको दायरामा ल्याउन राष्ट्रिय मानवअधिकार आयोगले सरकारसँग माग गरेको छ । आयोगले आज एक सूचना प्रकाशन गर्दै उखु किसान र सरकारबीच सहमति भएअनुसारको समय सकिएको भन्दै बक्यौता रकम भुक्तानी नगर्ने उद्योगीलाई तत्काल कारवाही गर्न आयोजले माग गरेको हो ।
सरकार र उखु किसान बीच भएको सम्झौता कार्यान्वयनको अवस्थाबारे आयोगले धनुषा, सर्लाही र महोत्तरी जिल्लामा स्थलगत अनुगमन समेत गरेको जनाएको छ ।
लामो समयसम्म चिनी मिलले उखुको बक्यौता रकम भुक्तानी नगरेको भन्दै मंसिर २८ गतेदेखि उखु किसानले काठमाडौँमा आन्दोलन सुरु गरेका थिए । आन्दोलन रत किसान र उद्योग, वाणिज्य तथा आपूर्ति मन्त्रालयबीच पुस १३ गते २१ दिनभित्र बक्यौता रकम भुक्तानी गर्न सम्झौता भएको थियो ।
उक्त सम्झौता अनुसारको समय सोमबार सकिदापनि हालसम्म तीन चिनी मिलले ८ करोड बढी बक्यौता रकम भुक्तानी गरेका छैनन् ।
