रामेछापमा यसवर्ष जुनार उत्पादन बढेको छ । उत्पादन बढेको र फलेको जुनारमा रोग किरा नदेखिएपछि किसान पनि खुशी भएका छन् ।
जुनार उत्पादनका लागि प्रख्यात रामेछाप नगरपालिकाको ओख्रेनी, गाईटार, सुकाजोर, रामपुर, हिमगंगा लगायतका भेगमा किसानका बगैँचा जुनारले पँहेलपुर बनेका छन् । जुनार किन्न बगैँचामै पुग्ने र बगैँचामा घुम्न पुग्नेहरू पनि बढेका छन् ।
जुनारका बगैँचा घुम्न पुगेका आन्तरिक घुमन्ते तथा पर्यटहरूले रामेछाप जुनारको जिल्लाको रुपमा ख्याती कमाएको जिल्ला भन्दै प्रशंसा गरेका छन् । उनीहरुले जुनार स्वादिलो रहेको प्रतिक्रिया पनि दिएका छन् ।
विगत वर्षहरूमा रामेछापका जुनार पकेट क्षेत्रमा फलेका जुनारसहितका फलफूलमा किरा लाग्न समस्या देखिएको थियो । तर, यसवर्ष यस्तो समस्या देखिएको छैन ।
प्रधानमन्त्री कृषि आधुनिकिकरण परियोजना, परियोजना कार्यान्वयन ईकाइ रामेछापको जुनार जोनको सहयोगमा ९० प्रतिशतभन्दा बढी रोग नियन्त्रण भएको दाबी गरिएको छ । परियोजना कार्यान्वयन ईकाइ रामेछापका प्रमुख थिरलाल गैरेले नर्सरी उत्पादनदेखि उत्पादित जुनारको बजारीकरणसम्मको योजना बनाएर काम भइरहेको बताएका छन् ।
यसै वर्षदेखि रामेछापमा उत्पादित जुनारको ब्राण्डिङ, लेवलिङ र प्याकेजिङको काम सुरु हुँदैछ ।
यस वर्ष रामेछापमा करिब १५ हजार मेट्रिक टन जुनार उत्पादन हुने अपेक्षा गरिएको छ ।
