विश्वकै ठूलो मध्येको एक चीनको बेइजिङस्थित डाक्सिङ विमानस्थलमा नेपालको हिमालय एयरलाइन्सले स्लट पाएको छ । चीनका विभिन्न शहरमा उडानको तयारीमा रहेको हिमालय एयरलाइन्सले बेइजिङको नयाँ विमानस्थलमा उडान गर्न स्लट पाएको कम्पनीका उपाध्यक्ष विजय श्रेष्ठले जानकारी दिए ।
हिमालयले उक्त विमानस्थलमा दैनिक एक उडान गर्ने गरी स्लट पाएको हो । हिमालयले ल्याउन लागेको १२८ सिट क्षमताको ए ३१९ जहाजमार्फत बेइजिङमा उडान गर्ने भएको हो ।
यसैबीच हिमालयले मलेसियामा पनि उडान विस्तार गर्ने भएको छ । यसअघि पनि मलेसिया उडान गरेको हिमालयले मलेसियाको रोजगारी बन्द भएपछि उडान कटौती गरेको थियो ।
