नेपाली र चिनियाँ लगानीमा सञ्चालित नीजि क्षेत्रको हिमालय एयरलाइन्सले काठमाडौँका तीन अस्पताललाई स्वास्थ्य सामग्री सहयोग गरेको छ । हिमालयले शहिद गंगालाल हस्पिटल बाँसकारी, राष्ट्रिय ट्रमा सेन्टर र मनमोहन मेमोरियल सामुदायिक अस्पतालाई पिपिई सेट र आरडीटी किट सहयोग गरेको हो ।
हिमालयको ब्राण्ड तथा सेवा सुधार विभागकी प्रमुख उज्ज्वला दलीले ट्रमा सेन्टर र गंगालाल अस्पतालाई १ सय थान पिपिई र १ सय थान आरडीटी परीक्षण किन हस्तान्तरण गरेकी हुन् ।
यसैगरी उनले १ सय थान पिपिई सेट, १ सय थाना आरडीटी किट, २ सय थान सर्जिकल मास्क तथा ग्लोब्स, ५० थान एन–९५ मास्क तथा फेस शिल्ड्स, ५ सय थाना शुज कभर, ५ बोतल ह्याण्ड स्यानिटाइजर लगायतका स्वास्थ्य सामग्री मनमोहन अस्पताललाई हस्तान्तरण गरिएको जानकारी दिईन् ।
यसअघि हिमालयले सरकारको कोभिड–१९ कोषमा एक करोड आर्थिक सहयोग गरेको थियो भने । कोभिड–१९ महामारी रोकथामका चिकित्सा सामाग्रीहरुका ढुवानीका लागि ३७ वटा कार्गो उडान मार्फत ३ सय २८ टन सामाग्रीहरु नेपाल ल्याउन सहयोग गरेको जनाइएको छ । यसैगरी विभिन्न देशमा अलपत्र परेका नेपालीलाई स्वदेश फर्काउन गरेको चार्टर्ड १ सय १८ उडान मार्फत १९ हजार ४४२ जनाको उद्धार गरेको छ ।
हिमालयले मलेसियाको क्वालालम्पूर, साउदी अरबको दमाम, युएईको अबुदाबी, दुबई, बंगलादेशको ढाँका, कतारको दोहा र चीनका पाँच शहरमा उडान गर्दै आएको छ । हिमालयसँग एयरबस ए–३२० सिरिजका १८० सिट क्षमताका तीन र १२० सिट क्षमताको ए ३१९–११५ एअरक्राफ्ट गरी चार विमान रहेका छन् ।
