नेपाल एयरलाइन्सको नियमित उडानमार्फत हङकङ गएका ५ नेपालीमा कोरोना भाइरस संक्रमण पुष्टि भएसगैँ निगमको उडान रद्द भएको छ । गत शुक्रबार निगमको न्यारोबडीमार्फत हङकङ गएका १२० जनामध्ये ५ जनामा पोजेटिभ देखिएपछि हङकङले निगमलाई कारवाही गर्दै १४ दिन उडान बन्द गरेको हो ।
अन्तराष्ट्रिय रुपमा नै लागु भएको नियम अुनसार उडान सुरु हुनु ७२ घन्टा अघिको पीसीआर नेगेटिभ रिपोर्ट लिएर हङकङ पुगेका उनीहरुमा कोरोना देखिएपछि हङकङ सरकारले निगमलाई कारवाही गरेको हो ।
निगमकी प्रवक्ता अचर्ना खड्काका अनुसार हङकङ सरकारले दुई साता उडान बन्द गर्न भनेपछि उडान बन्द गरिएको हो । नेपालबाट पीसीआर रिपोर्ट नेगेटिभ लिएर हङकङ गएकाहरुमा उता पुगेपछि कसरी पोजेटिभ देखियो भन्ने अन्योल रहेको उनको भनाई छ ।
यात्रुले सावधानी नअपनाउँदा उडान रोक्नुपरेको निगमको दाबी छ । अक्टोबर २ मा भएको उडानमार्फत हङकङ गएका ५ जनामा सोमबार कोरोना पोजेटिभ रिपोर्ट आएसगैँ आगामी अक्टोबर १७ सम्म निगमको उडान बन्द हुने भएको हो ।
