नेपाल वायु सेवा निगमले लापरवाही गरेको भन्दै मलेसिया स्टेशनका कर्मचारीलाई कारबाही गरेको छ । कर्मचारीले गल्ती गरेका कारण निगमको जहाजमार्फत काठमाडौं आएका एक यात्रुको कोरोना रिपोर्ट पोजेटिभ पाइएको भन्दै निगमले कर्मचारीलाई अब मलेसिया स्टेशनमा सधैंका लागि जान नपाउने गरी फिर्ता बोलाएको हो । फिर्ता हुनेहरुमा मलेसिया स्टेशनका कन्ट्री म्यानेजर नरेशकुमार श्रेष्ठ, स्टेशन म्यानेजर युवराज आचार्य र फाइनान्स म्यानेजर इन्द्र थापा रहेका छन् ।
गत डिसेम्बर ३० मा मलेसियाबाट निगमको ४०१६ उडान नम्बरको जहाजमार्फत बिहान ९ बजे काठमाडौँ अवतरण गरेका एक यात्रु कोरोना पोजेटिभ रिपोर्ट बोकेरै आएको भेटिएको थियो ।
निगमको न्यारोबडी ए ३२० जहाजमार्फत १४५ यात्रु नेपाल आएका थिए । तीमध्ये होटल क्वारेन्टिनमा बसेका ५४ जनाको खर्च फिर्ता बोलाईएका कर्मचारीले नै तिर्नुपर्ने भएको छ ।