जनकपुरधाम विमानस्थलको फल्स सिलिङ खसेको छ । जनकपुरधामस्थित विमानस्थलको नवनिर्मित फल्स सिलिङमा प्रयोग हुने सिमेन्ट बोर्ड खस्दा एक जना घाइते भएका छन् ।
घाइते हुेमा धनुषाको धनौजी गाउँपालिका ५ का ३९ वर्षीय मोहम्मद उसलेन खान रहेका छन् । विमानस्थलको छानामुनि बसिरहेको अवस्थामा अचानक फल्स सिलिङ खसेर थिचेपछि उनी घाइते भएका हुन् ।
यात्रीको प्रतीक्षामा बसिरहेका उसलेन सवारी चालक रहेको विमानस्थलका प्रमुख किरण गौतमले जानकारी दिए । उनको अहिले जानकी हेल्थ केयर एन्ड टिचिङ हस्पिटलमा उपचार भइरहेको छ । टाउकोमा गम्भिर चोट लागेका उनलाई १५ वटा टाँका लगाइएको छ ।
विमानस्थलको निर्माण सकिएको ६ महिना पनि नबित्दै भत्किन सुरु गरिसकेको छ । ४२ करोडको लागतमा निर्माण गरिएको कन्ट्रोल टावर पनि भत्किन थालिसकेको छ ।
तस्बिरः रातोपाटी