नेपाल नागरिक उड्डयन प्राधिकरणको महानिर्देशकमा बरिष्ठलाई पाखा लगाएर कनिष्ठलाई नियुक्त गरिएको छ । पर्यटन तथा नागरिक उड्ययनमन्त्री प्रेम आलेको प्रस्तावमा सोमबारको मन्त्रिपरिषद बैठकले ११ औँ तहका प्रदीप अधिकारीलाई क्यानको महानिर्देशकमा नियुक्त गरेको हो ।
मंगलबार सार्वजनिक भएको मन्त्रिपरिषद्को निर्णयमा प्राधिकरणको महानिर्देशक नियुक्तिबारे कुनै विषय उल्लेख भनेको छैन । तर, अधिकारीलाई नियुक्त गरिसकिएको र कनिष्ठलाई हाकिम बनाएको भन्दै विवाद आउने देखेर मन्त्री आलेले सञ्चारमन्त्री ज्ञानेन्द्र बहादुर कार्कीलाई यो निर्णय सार्वजनिक नगरिदिन अनुरोध गरेको स्रोतको दाबी छ ।
पौष २५ गतेदेखि क्यानमा महानिर्देशक पद खाली थियो ।
१२ औं तहका ६ जना अधिकारीहरुलाई पाखा लगाउँदै आलेले ११ औं तहका अधिकारीको नाम मन्त्रिपरिषदमा सिफारिस गरेर निर्णय पनि गराउन सफल भएका हुन् । मन्त्री आले आफैँले प्राधिकरणको बोर्ड बैठकमा अधिकारी महानिर्देशकमा नियुक्ति भएको विषयमा जानकारी गराएको स्रोत बताउँछ ।
आज बुधबार सार्वजनिक बिदा भएकाले अधिकारीले बिहिबार मन्त्रालयबाट नियुक्तिको चिठी बुझ्ने छन् ।
क्यानमा १२औँ तहका भोलाप्रसाद गुरागाईं, प्रतापबहादुर तिवारी, हंशराज पाण्डेय, देवचन्द्रलाल कर्ण, गोविन्दप्रसाद दाहाल र प्रेमनाथ ठाकुर थिए । ठाकुरले निमित्त महानिर्देशकको जिम्मेवारी पनि सम्हालेका थिए । तर, बरिष्ठताका आधारमा प्रतापबहादुर तिवारी महानिर्देशक बन्नुपर्ने थियो ।