नेपाल राष्ट्र बैंकले आगामी माघ १ गतेदेखि बैंक र लघुवित्त वित्तीय संस्थामा खाता खोल्दा राष्ट्रिय परिचयपत्र अनिवार्य गर्न निर्देशन जारी गरेको छ। यस निर्णयसँगै बैंक तथा वित्तीय संस्थाहरूलाई राष्ट्रिय परिचयपत्रको विद्युतीय अभिलेखमा रहेको विवरणका आधारमा खाता खोल्नुपर्ने अनिवार्य व्यवस्था लागू गरिनेछ। यस क्रममा ग्राहकको पहिचान र पुष्टि (केवाईसी) प्रक्रिया पनि राष्ट्रिय परिचयपत्रमार्फत नै गरिनेछ।
यो निर्णय राष्ट्र बैंकले बुधबार जारी गरेको एकीकृत निर्देशनमा संशोधन गर्दै लागू गरेको हो। सरकारको कार्यतालिका अनुसार माघ १ देखि राष्ट्रिय परिचयपत्र अनिवार्य बनाउने निर्णय गरिएको थियो, तर सर्वोच्च अदालतमा रिट दायर भएपछि उक्त निर्णय कार्यान्वयनमा रोकिएको थियो। यद्यपि, राष्ट्र बैंकले भने आफ्ना निर्देशिकामा यसलाई अनिवार्य गरेको छ।
नयाँ निर्देशन अनुसार, अब खाता खोल्दा केवाईसी विवरण भरिराख्नु पर्ने छैन । यदि ग्राहकले राष्ट्रिय परिचयपत्रको विद्युतीय अभिलेखको आधारमा खाता खोल्न चाहन्छ भने यसले खाता खोल्ने प्रक्रिया थप सजिलो बनाउने अपेक्षा गरिएको छ। यससँगै, नेपाल सरकारले सामाजिक सुरक्षा कोष लगायतका सरकारी भुक्तानी दिने समयमा सम्बन्धित सरकारी निकायको विवरणको आधारमा पनि बैंकले खाता खोल्नुपर्नेछ।
त्यस्तै, राष्ट्र बैंकले बैंक र लघुवित्त वित्तीय संस्थालाई लघुवित्त क्षेत्रका खाता खोल्दा पनि राष्ट्रिय परिचयपत्र अनिवार्य बनाउन निर्देशन दिएको छ। यसले सम्पत्ति शुद्धीकरण (मनी लाउन्डरिङ) निवारण ऐन र नियमावली अनुरूप ग्राहकको पहिचान र पुष्टि सुनिश्चित गर्नेछ।
निर्देशन अनुसार, आगामी माघ १ गतेसम्म बैंक तथा वित्तीय संस्थाले सबै उच्चपदस्थ व्यक्तिको खातामा पनि राष्ट्रिय परिचयपत्रको विवरण अद्यावधिक गर्नुपर्नेछ। साथै, विद्युतीय माध्यमबाट गरिने कारोबारमा सुरक्षा उपायहरू अपनाउनका लागि बैंक र वित्तीय संस्थाहरूलाई विशेष सावधानी अपनाउन निर्देशन दिइएको छ ।
.gif)
