एनएमबि बैंकद्वारा इयु र आईएफसीसंगको सहकार्यमा जलवायु व्यवस्थापनसम्बन्धी तालिम

एनएमबि बैंकले युरोपियन युनियन (ईयू) को सहयोगमा अन्तर्राष्ट्रिय वित्त निगम (आईएफसी) सँग सहकार्य गर्दै तीन दिने विशेष तालिम सम्पन्न गरेको छ। तालिममा ऊर्जा, कृषि व्यवसाय तथा साना तथा मध्यम उद्यम (एसएमई) क्षेत्रमा जलवायु वित्त र जोखिम व्यवस्थापन सुदृढ गर्ने विषयमा प्रशिक्षण दिइएको थियो।

नेपाल जलवायु जोखिमको दृष्टिले अति संवेदनशील मुलुक भएकाले बैंकिङ तथा व्यवसायमा पर्यावरणीय, सामाजिक र सुशासन (ईएसजी) अभ्यासलाई समाहित गर्न आवश्यक रहेको तालिममा जोड दिइएको थियो। एनएमबि बैंकले यस तालिमले प्रभावकारी जोखिम व्यवस्थापन तथा वित्तीय स्थायित्वमा योगदान पुर्याउने विश्वास व्यक्त गरेको छ।

आईएफसीका विशेषज्ञहरू तथा स्थानीय परामर्शदाताहरूले तालिममा क्षेत्रीय तथा विश्वव्यापी वित्तीय अभ्यासबारे जानकारी गराएका थिए। तालिममा एनएमबि बैंकका व्यवसायिक टोली, जोखिम अधिकृतहरू तथा ग्राहकहरू गरी ९० जना सहभागी भएका थिए।

सहभागीहरूले वातावरणीय तथा सामाजिक उचित परिश्रम, जैविक विविधता व्यवस्थापन, श्रम अधिकार, भूमि पुनर्स्थापना तथा स्रोत दक्षता जस्ता विषयहरूमा अन्तरदृष्टि पाउने अवसर प्राप्त गरेका थिए।

एनएमबि बैंकले दिगो वित्तीय अभ्यासलाई प्राथमिकता दिँदै यस्ता कार्यक्रमहरूलाई निरन्तरता दिने प्रतिबद्धता जनाएको छ। बैंकले वातावरणमैत्री वित्तीय संरचनाको विकास गर्दै जलवायु वित्तलाई अझ प्रभावकारी बनाउन विभिन्न राष्ट्रिय तथा अन्तर्राष्ट्रिय संस्थासँग सहकार्य गर्ने बताएको छ।