नेपाल राष्ट्र बैंकले बाणिज्य बैंकहरुलाई मौद्रिक नीति अगाडी नै आफु अनुकुल मर्जरको पार्टनर खोज्न निर्देशन दिईसकेको छ । राजधानीको तारे होटेलमा बैंकका अध्यक्ष र सीइओहरुको भेला गरेर मर्जरमा जानको लागि पार्टनर खोज्न एक हप्ताको समय दिएको थियो । एक हप्ते अवधि बिहिबार सकिदै छ ।
राष्ट्र बैंकको निर्देशन पाए लगत्तै बैंकहरु आफु अनुकुलको पार्टनर खोज्न व्यस्त देखिएका छन् । अधिकांश बैंकहरु मानसिक रुपमा नै मर्जको लागे तयार देखिएका छन् । बैंकहरु बीच मर्जरमा जाने तर कसरी जाने भन्नेबारे ब्यापक छलफल चलिरहदा विदेशी लगानीको स्ट्याण्डर्ड चार्टर्ड र विदेशी लगानी भएको नबिल बैंक भने यो चटारोबाट टाढा नै रहेका छन् ।
स्थानीय तहमा अनिवार्य शाखा विस्तार गर्नु पर्ने नियमले नछोएको चार्टडलाई मर्जरले पनि नछुने देखिन्छ । मर्जर गर्नु परे नेपालबाट आफ्नो बिजनेश बन्द गरेर फर्किने चेतावनी दिन सक्ने भएकोले राष्ट्र बैंकले चार्टर्डलाई कुनै दबाब नदिने स्पष्ट छ । यता विभिन्न फोरममा बोल्ने क्रममा मर्जरमा नजाने बताउदै आएका नबिल बैंकका सीइओ अनिल केशरी शाहले बैंकर्स संघको बैठक मै बाध्यात्मक अवस्थामा मात्र बैंक मर्जरमा जाने बताएका थिए ।
हकप्रदको बाटो रोकेर चुक्ता पुँजी वृद्धिको निर्देशन आएको अवस्थामा विदेशी पार्टनर खडा गरेर त्यतैबाट चुक्ता पुंजी पुर्याउने तर मर्जमा नजाने नबिलको नीति रहेको स्रोतले जनाएको छ । तर विदेशी साझेदार वा हकप्रदको विकल्प रोकेर चुक्ता पुंजी बढाउने वा अनिवार्य रुपमा मर्जमा जानलाई निर्देशन आए मात्र नबिल मर्जमा जाने स्रोतको दाबी छ।