वाणिज्य बैंकहरुको छाता संगठन नेपाल बैंकर्स संघले वाणिज्य बैंकहरुलाई ब्रोकर लाईसेन्स दिन माग गरेको छ । मौद्रिक नीतिको लागि नेपाल राष्ट्र बैंक समक्ष सुझाव दिदै संघले बैंकलाई ब्रोकर लाईसेन्स दिनको लागि पहल गरिदिन आग्रह गरेको हो ।
कतिपय देशहरुमा बैंकहरुले धितोपत्र ब्रोकरको कार्यहरु गर्दै आएका र नेपाल राष्ट्र बैंकले तोकेको व्यवस्था अनुसार सोका लागि केही बैंकहरुले पनि सहायक कम्पनीहरु समेत खोली सकेको अवस्थामा लाईसेन्सको लागि पहल गरिदिन संघले आग्रह गरेको हो । सहायक कम्पनीहरुले देशका कुना कुनामा छरिएका वाणिज्य बैंकहरुका शाखा मार्फत ग्रामिण क्षेत्रमा पनि पुंजी बजारलाई विस्तार गर्न सक्ने भन्दै बैंकले लाईसेन्स माग गरेको हो ।
आफ्नो सुझावमा संघले भनेको छ ' वाणिज्य बैंकका सहायक कम्पनीले हाल ब्रोकर लाइसेन्स पाउन नसकेको अवस्था छ । यसका लागि तहाँबाट समेत पहल भएमा वित्त बजारलाई सहयोग पुग्ने देखिन्छ।'