बैंक तथा वित्तीय संस्थाहरुले सहुलियत कर्जा अन्तर्गत प्रदान गरेको ऋण मध्ये ५५ अर्ब उठाउन बाँकि रहेको छ । २०७७ जेठ मसान्तसम्ममा कृषि तथा पशुपंक्षी व्यवसाय कर्जा अन्तर्गत २३,३१८ ऋणीको ५१ अर्ब ४७ करोड कर्जा बक्यौता रहेको नेपाल राष्ट्र बैंकले जनाएको हो । यस्तै, सहुलियतपूर्ण कर्जाका अन्य शीर्षक अन्तर्गत ५,८३९ ऋणीको ४ अर्ब ७ करोड कर्जा बक्यौता रहेको केन्द्रीय बैंकले जनाएको हो ।
यस्तै राष्ट्र बैंकले उत्पादनशील गतिविधि तथा निर्यातलाई प्रोत्साहित गर्ने उद्देश्यले सहुलियत दरमा प्रदान गरिदै आएको पुनरकर्जा २०७७ जेठ मसान्तमा ११ अर्ब ८२ करोड लगानीमा रहेको जनाएको छ । यस अन्तर्गत साधारण पुनरकर्जा ९ अर्ब ९९ करोड र निर्यात पुनरकर्जा रु.२२ करोड २ लाख उपयोग भएको छ ।
भूकम्प पीडितलाई आवासीय घर निर्माणको लागि सहुलियतपूर्ण कर्जा प्रदान गर्न यस बैंकबाट बैंक तथा वित्तीय संस्थालाई उपलब्ध गराइएको पुनरकर्जाको बक्यौता २०७७ जेठ मसान्तमा १ अर्ब ६१ करोड रहेको छ ।
