मेगा बैंक Mega Bank Nepal Limited ले चीनको प्रख्यात ‘वीच्याट–पे’ सँग भुक्तानी सेवाको सम्झौता गरेको छ । सम्झौतापछि ‘वीच्याट–पे’ मोबाइल वालेट प्रयोगकर्ताहरुले मेगा बैंक अन्तर्गतका मर्चेन्टहरुमा राखिएका क्यूआर कोड स्क्यान गरी डिजिटल रुपमा रकम भुक्तानी गर्न सक्ने भएका छन् ।
नेपाल भ्रमण गर्ने चिनियाँ पर्यटकहरु तथा नेपालबाट सामान आयात गर्ने चिनियाँ व्यापारीहरुले अब बिभिन्न सामाग्री तथा सेवाको लागि ‘वीच्याट–पे’ मार्फत रकम भुक्तानी गर्न सक्ने बैंकले जनाएको छ । चीनमा निकै लोकप्रिय रहेका ‘वीच्याट–पे’ मार्फत नेपालमा रकम भुक्तानी गर्न पाउँदा चिनियाँ पर्यटकहरुलाई सहज हुने बैंकको विश्वास छ ।
बैंकका प्रमुख बजार अधिकृत (सीएमओ) मनोज खड्काले यस सम्झौतासँगै राष्ट्रलाई विदेशी मुद्रा आर्जनमा सघाउ पुग्ने विश्वास लिईएको बताएका छन् ।
