नेपाल राष्ट्र बैंकले नवनियुक्त डेपुटी गभर्नरहरू डा. नीलम ढुङ्गाना तिम्सिना र बम बहादुर मिश्रको कार्य विभाजन जिम्मेवारी तय गरेको छ । नेपाल सरकार, मन्त्रीपरिषद्को २०७७ फागुन २५ गतेको निर्णय अनुसार उनीहरु डेपुटी गभर्नर पदमा नियुक्त भएका हुन्।
दुवै डेपुटी गभर्नरले ४-४ समुहको जिम्मेवारी पाएका छन् । डा. नीलम ढुङ्गाना तिम्सिनाले मौद्रिक तथा विदेशी विनिमय नीति समुह, बैंकिंग ब्यबस्थापन समुह, नियमन तथा सुपरिवेक्षण समुह, र सहायक सेवा समुहको जिम्मेवारी पाएकी छिन् । मौद्रिक तथा विदेशी विनिमय नीति समुह अन्तर्गत विदेशी विनिमय ब्यबस्थापन विभाग, र राष्ट्र ऋण ब्यबस्थापन विभाग रहेको छ भने बैंकिंग ब्यबस्थापन समुह अन्तर्गत भुक्तानी प्रणाली विभाग र बैंकिंग विभाग रहेको छ। त्यस्तै सहायक सेवा समुह अन्तर्गत जनशक्ति ब्यबस्थापन विभाग, वित्त ब्यबस्थापन विभाग र सूचना प्रविधि महाशाखा रहेको छ भने नियमन तथा सुपरिवेक्षण समुह अन्तर्गत बैंक तथा वित्तीय संस्था नियमन विभाग रागेको छ । यी सबै विभाग र महाशाखाको जिम्मेवारी डा. नीलम ढुङ्गाना तिम्सिनाले पाएकी छिन् ।
बम बहादुर मिश्रले भने नियमन तथा सुपरिवेक्षण समुह, सहायक सेवा समुः, मौद्रिक तथा विदेशी विनिमय नीति समुह र बैंकिंग ब्यबस्थापन समुहको जिम्मेवारी पाएका छन् । नियमन तथा सुपरिवेक्षण समुह अन्तर्गत बैंक सुपरिवेक्षण विभाग, विकास बैंक सुपरिवेक्षण विभाग, बित्त्त कम्पनी सुपरिवेक्षण विभाग रहेका छन् । त्यस्तै सहायक सेवा समुह अन्तर्गत सम्पति तथा सेवा ब्यबस्थापन, मुद्रा ब्यबस्थापन विभाग, र संस्थागत योजना तथा जोखिम ब्यबस्थापन विभाग रहेका छन् ।
त्यस्तै मौद्रिक तथा विदेशी विनिमय नीति समुह अन्तर्गत आर्थिक अनुसन्धान विभाग रहेको छ भने बैंकिंग ब्यबस्थापन समुह अन्तर्गत राष्ट्र बैंकका ८ वटा प्रदेश कार्यालय रहेको छ । विराटनगर, जनकपुर, बिरगंज, पोखरा, सिद्धार्थनगर, नेपालगंज, धनगढी र शुर्खेतमा राष्ट्र बैंकको प्रदेश कार्यलय रहेको छ । यी सबै विभाग र कार्यालयको जिम्मेवारी मिश्रले पाएका हुन् ।
ब्यबस्थापन समिति, गभर्नरको कार्यालय, वित्तीय जानकारी इकाई, र कानुन महाशाखा गभर्नर कै नेतृत्वमा रहने छ ।
दुवै डेपुटी गभर्नरले बुधबार नै पद तथा गोपनियता सपथ लिएर कार्यभार सम्हालेका थिए । सपथ कार्यक्रममा नवनियुक्त डेपुटी गभर्नर द्वय डा.नीलम ढुङ्गाना तिम्सिना र बम बहादुर मिश्रले संस्थाको गरिमामय जिम्मेवारी प्रदान गरेकोमा संस्था प्रमुख तथा नेपाल सरकारलाई धन्यवाद ज्ञापन गर्दै आफूमा खुसी तथा जिम्मेवारीबोध एकैपटक आएको जनाएका छन् । उनीहरुले संस्थाले परिलक्षित गरेको उद्देश्य हासिल गर्नमा दत्तचित्त भएर लाग्ने प्रतिबद्धता व्यक्त गर्दै पहिले जस्तै आगामी दिनमा पनि सबै पक्षबाट सहयोग कायम रहने विश्वास व्यक्त गरेका छन्।