नेपाल उद्योग वाणिज्य महासंघका अध्यक्ष शेखर गोल्छाले बैंकहरुले धम्कीको भाषा बोलेको टिप्पणी गरेका छन् ।
नाडा अटोमोबाइल्स एसोसियसन अफ नेपालले आजबाट काठमाडौँमा सुरु गरेको नाडा ईभी एक्सपोको उद्घाटनमा अध्यक्ष गोल्छाले भद्र सहमति तोडियो, अब ब्याजदर बढाउँछौँ भनेर बैंकहरुले धम्कीको भाषा बोलेको टिप्पणी गरेका हुन् ।
केही दिन अगाडी बैंकहरुले ब्याजदर नबढाउने भनेर कायम रहेको भद्र सहमति तोडेर ब्याजदर बढाउने निर्णय गरेका थिए । भदौ ३० गते कमर्शियल बैंकहरुबीच ब्याजदरबारे कायम भद्र सहमति हटेको हो ।
कमर्शियल बैंकहरुका प्रमुख कार्यकारी अधिकृत (सीईओ)हरुको छाता संगठन नेपाल बैंकर्स संघ (एनबिए) को कार्यसमितिको बैठकले भद्र सहमति हटाउने निर्णय गरेको थियो । त्यो निर्णयसँगै, राष्ट्र बैंकको निर्देशनभित्र रहेर बैंकहरुले आफुअनुकुल ब्याजदरबारे निर्णय लिन पाउने बाटो खुलेको थियो ।
त्यसैलाई लक्षित गर्दै महासंघका अध्यक्ष गोल्छाले ब्याजदर बढेको बढ्यै गर्ने परिपाटी अन्त्य हुनुपर्ने र औद्योगिक क्षेत्रमा लगानीको वातावरण बन्नुपर्ने बताए ।
‘ब्याजदर बढेको बढ्यै छ, बैंकहरुले धम्कीको भाषा बोलिरहेका छन्’ अध्यक्ष गोल्छाले भने, ‘हाम्रो भद्र सहमति टुट्यो, अब ब्याज बढ्छ भनेर बैंकहरुले धम्कीको भाषा प्रयोग गरिरहेका छन् ।’
