गभर्नर महाप्रसाद अधिकारीले नक्सालको
तरकारीबजारमा क्यूआर कोडको स्थलगत निरीक्षण गरेका छन् । दुई वर्ष अगाडि क्यूआर
कोडको 'औपचारिक' सुरुवात गरिएको काठमाण्डौको नक्सालस्थित तरकारी बजार र चिया पसलमा
गभर्नर अधिकारीले स्थलगत निरीक्षण गरेका हुन् ।
दुई वर्ष अगाडि आजकै दिन पुष १० गते
गभर्नर अधिकारीले नक्सालस्थित तरकारी बजारमा सानिमा बैंकको क्यूआर कोड राखेर यसको
औपचारिक सुरुवात गरेका थिए ।
स्थलगत निरीक्षणको क्रममा गभर्नर
अधिकारीले तरकारी बजारमा एउटा पसलबाट किनेको तरकारीको र चियाको पैसा क्यूआर कोडबाट
भुक्तानी गरेका छन् । स्थलगत निरीक्षणको क्रममा गभर्नर अधिकारीसँगै उनको सचिवालयका
केही सदस्य तथा सानिमा बैंकका प्रमुख कार्यकारी अधिकृत निश्चलराज पाण्डे पनि
उपस्थित थिए ।
काठमाडौँ उपत्यकामा मात्र नभई
उपत्यका बाहिरका धेरै ठाउँमा पनि क्यूआर कोडको विस्तार भएकोमा खुसि व्यक्त गर्दै
गभर्नर अधिकारीले यसलाई थप देशव्यापी बनाउनुपर्ने धारणा समेत व्यक्त गरेका छन् ।
गभर्नर अधिकारीले नेपाल राष्ट्र
बैंकले डिजिटल भुक्तानीलाई प्राथमिकतामा राखेर काम गरिरहेको र सोहीअनुसार नीति
निर्माण गरी सरोकारवालाहरुलाई यसको विस्तारमा प्रोत्साहन गरिरहेको बताएका छन् ।
२०७८ कात्तिक मसान्तसम्म क्यूआर कोड
मार्फत १३ लाख ८७ हजार ५८४ वटा कारोबारबाट ५ अर्ब ३६ करोड २० लाखको कारोबार भएकोमा
२०७९ कात्तिक मसान्तसम्म आइपुग्दा यसको प्रयोग उल्लेख्य बढेको छ । यो एक बर्षको
अवधिमा कारोबार बढेर ४६ लाख १२ हजार वटा कारोबारबाट १६ अर्ब १४ करोड ४० लाखको
कारोबार भएको छ। 
तस्वीर - सन्दिप घिमिरे/बिजपाटी
