नेपाल राष्ट्र बैंकले ग्लोबल मनी विक (जीएमडब्ल्यू) २०२५ मनाउने तयारी गरेको छ। बैंकका अनुसार आगामी चैत ४ देखि १० गतेसम्म यो कार्यक्रम आयोजना गरिनेछ। राष्ट्र बैंकका अनुसार, ग्लोबल मनी विकको उद्देश्य वित्तीय ज्ञान, सीप र व्यवहारको विकास गर्नु हो।
विशेषगरी बालबालिका र युवामाझ वित्तीय साक्षरता अभिवृद्धि गर्ने लक्ष्य राखिएको छ। वित्तीय ज्ञानले बालबालिका र युवालाई जिम्मेवार आर्थिक निर्णय लिन सशक्त बनाउने राष्ट्र बैंकले जनाएको छ।
यो विश्वव्यापी वित्तीय चेतनामूलक अभियान हालसम्म १७६ देशका ६ करोडभन्दा बढी बालबालिका र युवासम्म पुगिसकेको छ। नेपालमा पनि राष्ट्र बैंकले विभिन्न वित्तीय संस्थासँग सहकार्य गरी कार्यक्रमहरू सञ्चालन गर्ने बताएको छ।
बैंकका अनुसार, वित्तीय साक्षरता नबढाएसम्म व्यक्तिगत र राष्ट्रिय स्तरमा आर्थिक समृद्धि हासिल गर्न कठिन हुन्छ। त्यसैले, जीएमडब्ल्यू २०२५ अन्तर्गत बैंक, वित्तीय संस्था, विद्यालय, विश्वविद्यालय र अन्य सरोकारवाला निकायहरूलाई समेटेर विभिन्न वित्तीय सचेतनामूलक कार्यक्रमहरू गरिनेछ।
राष्ट्र बैंकले वित्तीय साक्षरताका कार्यक्रमलाई निरन्तरता दिने प्रतिबद्धता व्यक्त गर्दै, विशेषगरी युवा पुस्तालाई वित्तीय ज्ञानप्रति अभिप्रेरित गर्ने लक्ष्य राखेको जनाएको छ।
.gif)
.gif)
