विराटनगरको तुलसी बहुमुखी सहकारी संस्थाको डेढ अर्ब रकम दुरुपयोग गर्ने सञ्चलक तथा कर्मचारीविरुद्ध मङ्गलबार मोरङ जिल्ला अदालतमा दर्ता भएको ठगी मुद्दामा पक्राउ परेकाहरुमाथि बयान नसकिँदा थुनछेक बहस भोलि हुने भएको छ ।
जसका कारण पक्राउ परेका तीन जनालाई कारागार पठाउने वा नपठाउने भन्ने निर्णय भोलिनै हुने भएको हो । आठ नम्बर न्यायाधीश प्रकाश कोइरालाको इजलासमा दुई जनाको बयान सकिएको र एक जनाको बाँकी रहेको छ ।
उनीहरुविरुद्ध एक हजार ३०७ जनाले ६८ करोड हिनामिना गरेको आरोपमा जाहेरी दिएका थिए । सोही आधारमा स्थानीय प्रहरीले सिआइवीको समेत सहयोग लिएर तयार पारेको अनुसन्धान प्रतिवेदनका आधारमा जिल्ला सरकारी वकीलको कार्यालयले मङ्गलबार अभियोजन दर्ता गरेको हो ।
सहकारी ठगी मुद्दामा ९ जनालाई कारवाही गर्ने गरी प्रहरीले राय दिए पनि उक्त मुद्दाका आरोपी रहेका लेखापरीक्षक भने जिल्ला सरकारी वकीलको कार्यालयमा आवश्यक पर्दा उपस्थित हुने गरी छुटेका छन् । उनीमाथि वकील कार्यालयले मुद्दा नचल्ने निर्णय गरेकाले पक्राउ परेका तीन जनासँग मात्रै बयान भइरहेको जिल्ला अदालत मोरङका श्रेस्तेदार टिकेन्द्रवीर जङ्ग राणाले बिजपाटीलाई बताए ।
उनका अनुसार सहकारी ठगी प्रकरणमा सञ्चालक कर्मचारीसहित ९ जना आरोपी रहेका थिए । त्यसमध्ये प्रहरीले ४ जनालाई पक्राउ गरी अनुसन्धान अघि बढाएको थियो । पक्राउ पर्नेमा मोरङको उर्लाबारी घर भएकी सहकारीकी उपाध्यक्ष अनिता गौतम, झापाको भद्रपुर घर भएकी सचिव सविना न्यौपाने, सहकारीका क्षेत्रीय प्रबन्धक मन्दिप खवास र लेखापरीक्षक शीतल चन्द थिए ।
उनीहरु विरुद्ध मुद्दा चलाउने रायसहित प्रहरीले प्रतिवेदन दिएको थियो । सरकारी वकीलले लेखापरीक्षकको मुद्दा नचल्ने निर्णय गरेर कार्यालयबाटै फिर्ता पठाइदिएपछि तीन जनाको बयान भएको हो ।
उक्त सहकारी ठगीका मुख्य अभियुक्त अध्यक्ष केदारनाथ शर्मासहितका पाँच जना भने फरार छन् । शर्मा भारतमा रहेको खुलेको छ । उनकै योजनामा यसअघि सञ्चालन भएको कोअपरेटिभका ऋणी रोशनकी श्रीमती सविना न्यौपानेसँग मिलेर शर्माले तुलसी सहकारी स्थापना गरेका थिए ।
उनीहरुविरुद्ध एक हजार ३०७ जनाको जाहेरी परेको थियो । झण्डै डेढ अर्ब ठगी गरेको दावी गरिए पनि अदालतमा भने ६८ करोड विगो दावीसहितको असुलउपर गरी हदैसम्मको कारवाहीका लागि भन्दै सरकारी वकीलको कार्यालयमार्फत अभियोजन दर्ता भएको छ ।
मोरङको विराटनगर महानगरापालिका–३ शंकरपुरस्थित तुलसी बहुउद्देश्यीय सहकारीका सञ्चालक कर्मचारीमाथि नागरिकको एक अर्ब ४८ करोड ५५ लाख बढी बचत हिनामिना गरेको आरोप छ ।
यस अघि : ऋणीको श्रीमतीसँग मिलेर अर्को सहकारी, डेढ अर्ब डुबाउन काठमाडौँबाट विराटनगर
