नेपाल स्टक एक्सचेन्ज नेप्सेको प्रबन्धक पदमा स्थायी नियुक्तिको लागि लिलाधर सुवेदीको नाम सिफारिस भएको छ । नेप्सेको पदपूर्ति समितिले लोक सेवाले लिएको लिखित परीक्षाको अंक र अन्तर्वाताको औषत अंकको कुल योगको आधारमा सुवेदीको नाफ सिफारिस गरेको हो । सुवेदी बासगढी-७, बर्दियाका हुन् ।
प्रबन्धक पदमा ३ जनाको नाम सर्टलिस्ट भएकोमा अन्तर्वातापछि सुवेदी सिफारिस भएका हुन्। सर्टलिस्टमा परेका अन्य २ उम्मेदवार भिमराज उप्रेती र प्रविन पन्दाक क्रमश पहिलो र दोस्रो वैकल्पिक उम्मेदवारको रुपमा सिफारिस भएका छन् । प्रविन पन्दाक हाल नेप्से कै कार्यरत उच्च तहकी कर्मचारी हुन् । हाल उनी कामु प्रबन्धक रहेकी छिन् । लोकसेवा आयोगले लिएको लिखित परीक्षापछि आवेदन दिएका २६ जना मध्ये ३ जना अन्तर्वार्ताको लागि छनौट भएका थिए ।
नेप्सेमा प्रबन्धक भनेको १० औ तहको पद हो । हाल यस पदमा निरन्जन फुयाल रहेका छन् । उनी आन्तरिक बढुवाबाट प्रबन्धक पदमा बढुवा भएका हुन् । १० औ तहमा २ जनाको दरबन्दी रहेकोले अब १ जना खुला प्रतिस्पर्धाबाट नियुक्त हुन लागेको हो।
नेप्सेमा ११ औ तह पनि रहेको छ । तह ११ भनेको नेप्सेमा सीइओ पछिको ठूलो पद हो । यो पदलाई डेपुटी सीइओको रुपमा पनि लिने गरिएको छ । हाल यो पद रिक्त छ । १० औ तहमा रहेका २ जना मध्ये बाट नै ११ औ तहमा बढुवा हुने भएकोले १० औ तहलाई महत्वका साथ हेरिएको छ ।
तह ६,७, र ८ औ तहमा पदपूर्तिको लागि लिइएको लिखित परिक्षा र अन्तर्वातापछि नियुक्ति सिफारिस भएकाहरुको नतिजा पनि नेप्सेले प्रकाशन गरेको छ ।