युनाइटेड अजोडमा उच्च व्यवस्थापनमा नयाँ नियुक्ति, तीन जना अधिकारी पदस्थापन

युनाइटेड अजोड इन्स्योरेन्स ले उच्च व्यवस्थापनमा तीन जना नयाँ अधिकारीहरू नियुक्त गरेको छ। कम्पनीले सञ्जय अर्याललाई महाप्रबन्धक, काशीनाथ बर्लाकोटीलाई महाप्रबन्धक तथा धिरज ढंगानालाई प्रमुख प्रबन्धक पदमा नियुक्त गरेको जनाएको छ।

सञ्जय अर्यालसँग २६ वर्षको बीमा क्षेत्रको अनुभव रहेको छ। उनले नेपाल इन्स्योरेन्समा मार्केटिङ विभाग प्रमुखको रूपमा काम गर्दै व्यापार प्रवद्र्धनमा लामो अनुभव हासिल गरेका छन्। साथै, उनले हिमालयन एभरेष्ट इन्स्योरेन्समा पनि दुई वर्ष मार्केटिङ विभागको प्रमुखको रूपमा जिम्मेवारी सम्हालेका थिए।

काशीनाथ बर्लाकोटी, जो चाटर्ड एकाउन्टेन्टसमेत हुन्, करिब ८ वर्ष हिमालयन एभरेष्ट इन्स्योरेन्समा कार्यरत थिए। उनको वित्तीय तथा बीमा क्षेत्रमा लामो अनुभव रहेको छ।

धिरज ढंगाना बैंकिङ क्षेत्रमा लामो समय काम गरेपछि बीमा क्षेत्रमा प्रवेश गरेका छन्। बैंकिङको अनुभवका आधारमा उनले बीमा क्षेत्रमा नयाँ व्यावसायिक रणनीति अपनाउने विश्वास गरिएको छ।

कम्पनीले नयाँ व्यवस्थापकहरूको नियुक्तिसँगै व्यापार प्रवद्र्धनलाई तीव्रता दिने, सेवा गुणस्तर सुधार गर्ने र प्रतिस्पर्धी बीमा बजारमा आफ्नो उपस्थिति अझ मजबुत बनाउने लक्ष्य राखेको छ।