विराटनगरका एक उद्योगीले आफूलाई आफ्नै पार्टनरले बन्धक बनाएर फिरौती लिएको भन्दै दिएको उजुरी उपर प्रहरीले अनुसन्धान सकेको छ ।
विराटनगरका उद्योगी अरुणकुमार राठीले आफूसमेत सञ्चालक रहेको नेपाल टाइम्स मिडिया प्रा.लि.का सञ्चालक साझेदार शहेन शाह भनिने अब्दुल खताबले आफूलाई अपहरणको शैलीमा बन्धक बनाएर ३० लाख फिरौती मागेको, १५ लाख दिएको र बाँकी १५ लाख दिने सर्तमा छुटेको भन्दै प्रहरीमा उजुरी दिएका थिए ।
उक्त उजुरीमाथि प्रहरीले अनुसन्धान सकेको हो । राठीलाई बन्धक बनाउन खताबलाई सहयोग गरेका भनिएका व्यक्ति फरार भएपछि प्रहरीले उजुरीकर्ताको दाबी सत्य हुन सक्ने भन्दै खताबलाई छोडेन । खताबका सहयोगीको खोजी कार्य जारी राखेर उनीमाथि अनुसन्धान जारी राख्यो । अनुसन्धानका क्रममा उजुरीकर्ताले दाबी गरे अनुसार खताबले बन्धक बनाएर राखेको प्रमाण फेला पर्दै गए ।
अन्त्यमा खताबका सहयोगी पनि प्रहरीको सम्पर्कमा आए । प्रहरीको सम्पर्कमा आएका ती व्यक्तिले उद्योगी राठीले उजुरीमा आफूलाई बन्धक बनाएको भन्दै गरेको दाबीमा बल पुग्ने बयान दिए ।
‘फरार रहेका व्यक्ति खताबका ड्राइभर रहेछन्, उनी आइसके’ विराटनगरका एसपी भन्छन्, ‘अनुसन्धान करिब करिब सकिएको छ । राम्रै प्रमाणहरु फेला परेका छन्, आज भोली नै सरकारी वकिलको कार्यालयमा बुझाउँछौँ ।’
यसअघिः
‘पार्टनरले नै अपहरण गरेर करङ भाँचिदिए, फिरौतीबापत १५ लाखको चेक दिएर उम्किएँ’
