विकास बैंकहरूको नाफा सामान्य वृद्धि : गरिमा अगाडि, ज्योति सबैभन्दा तीव्र बृद्धिमा

चालु आर्थिक वर्षको तेस्रो त्रैमाससम्ममा राष्ट्रियस्तरका विकास बैंकहरूले सार्वजनिक गरेको अपरिष्कृत वित्तीय विवरण अनुसार समग्र रूपमा बैंकहरूको खुद नाफा सामान्य रूपमा बढेको देखिएको छ । गत वर्षको तुलनामा यस अवधिमा बैंकहरूको नाफा ४.३५ प्रतिशतले बढेको हो ।

गत आर्थिक वर्षको चैत मसान्तसम्ममा ३ अर्ब ५३ करोड ८८ लाख रुपैयाँ खुद नाफा कमाएका ८ वटा राष्ट्रियस्तरका विकास बैंकहरूले चालु आर्थिक वर्षको सोही अवधिसम्ममा ३ अर्ब ६९ करोड २७ लाख रुपैयाँ नाफा कमाएका छन् ।

यीमध्ये गरिमा विकास बैंक सबैभन्दा धेरै खुद नाफा कमाउने बैंक बनेको छ । बैंकले ७३ करोड ३४ लाख रुपैयाँ नाफा कमाएर गत वर्षको तुलनामा ७.३२ प्रतिशतको वृद्धिदर हासिल गरेको छ । गत वर्ष शीर्ष स्थानमा रहेको मुक्तिनाथ विकास बैंकले भने चालु वर्षको सोही अवधिसम्ममा ७२ करोड ४८ लाख रुपैयाँ नाफा कमाएको छ, जुन गत वर्षको तुलनामा १६.८६ प्रतिशत कम हो ।

त्यस्तै, लुम्बिनी विकास बैंक ४ करोड ९७ लाख रुपैयाँ नाफासहित सबैभन्दा कम नाफा कमाउने विकास बैंक बनेको छ ।

विश्लेषणअनुसार ज्योति विकास बैंकले सबैभन्दा तीव्र नाफा वृद्धि हासिल गरेको छ । बैंकको नाफा १०१.१४ प्रतिशतले वृद्धि भई ३० करोड ६६ लाख रुपैयाँ पुगेको छ ।

८ विकास बैंकहरूमध्ये ३ बैंकको नाफा भने घटेको छ । तीमध्ये लुम्बिनी विकास बैंकको नाफा ८५.४५ प्रतिशतले घटेको देखिएको छ, जुन समग्र समीक्षामा सबैभन्दा बढी गिरावट हो ।