निषेधाज्ञापछि मालपोत कार्यालयमा भिड लाग्न सुरु भएको छ । झण्डै ५० दिनपछि मालपोत कार्यालय खुलेसँगै मालपोत कार्यालयमा सेवाग्राहीको भिड बढेको हो । असारमै घरजग्गा कारोबार लयमा फर्किन सुरु गरिसकेको छ ।
काठमाडौं उपत्यकामा बैशाख १६ देखि लागू भएको निषेधाज्ञा असार ८ देखि खुकुलो बनाईएको छ । लकडाउन खुलेसँगै काठमाडौँका ९ मालपोत कार्यालयमा सेवाग्राहीको भिड लागेको छ । भूमि व्यवस्थापन तथा अभिलेख विभागका अनुसार आइतबारदेखि बुधबारसम्म ४ दिनमा देशभरका १२६ मालपोतबाट १ अर्ब ७२ करोड रुपैयाँ राजश्व संकलन भएको छ ।
आइतबार ३८ करोड ८० लाख रुपैयाँ राजश्व संकलन हुँदा सोमबार ३६ करोड ४८ लाख रुपैयाँ राजश्व संकलन भएको छ । मंगलबार ४३ करोड ७५ लाख रुपैयाँ राजश्व संकलन भएको र बुधबार ५३ करोड २६ लाख रुपैयाँ राजश्व संकलन भएको विभागले जनाएको छ ।