खोज पत्रकारहरूको अन्तराष्ट्रिय संस्था आइसीआइजेले आज हालसम्म कै ठूलो आर्थिक अनियमितताको खुलासा गर्दै छ । आज बेलुकी नेपाली समय अनुसार १०:१५ बजे यसबारेको खुलासा हुने भएको छ ।
आइसीआइजेका अनुसार विश्वभरका ६ सय जना खोज पत्रकारले १ करोड १९ लाख बढी फाइलहरुको अनुसन्धान गरेर यो खुलासा गर्न लागेका हुन् । यसलाई पन्डोरा पेपर्स नाम दिईएको छ ।
नेपालको खोज पत्रकार केन्द्रले पनि यसमा खोज गरेको छ । केन्द्रका पूर्व सम्पादक शिव गाउँलेका अनुसार प्यान्डोरा पेपर्सको के छ नेपाल नाता भन्ने विषयमा खोज पत्रकारितामा काबिल नेपाली पत्रकारहरुको टीमले पनि ११ महिना लगाएर खोज गरेको छ । उनका अनुसार नेपाल सहितका विश्वभरका १ करोड १९ लाख गोप्य फाइलमाथि विश्वभरका ११७ देशका १५० मिडियाका ६०० भन्दा बढी पत्रकारको सहभागितामा गरिएको खोज आज सार्वजनिक हुन लागेको हो ।
अन्तर्राष्ट्रिय आर्थिक घोटाला, आर्थिक नियमितता, र आर्थिक घोटालाका विषयहरु यसमा समावेश हुने बताईएको छ । विश्वका नेता, ब्यापारी तथा विभिन्न उच्च प्रदस्थहरुबारे र विभिन्न क्षेत्रका हाई प्रोफाइल मानिने ब्यक्तिको खुलासा यस मार्फत आउँने छन् ।
आइसीआइजेले यस अघि पानामा पेपर्स, प्याराडाइज पेपर्स, फिनसेन फाइल्स नामक खुलासा गरेको थियो । ति खुलासामा नेपालका ब्यापारी तथा विभिन्न उच्च प्रदस्थहरुबारे र विभिन्न क्षेत्रका हाई प्रोफाइल मानिने ब्यक्तिहरुले कसरी कर छलि गरिरहेका छन् , कसरी अवैध धनको कारोबार गरिरहेका छन्, र कसरी विदेशमा धन लुकाई रहेका छन् भन्ने विषयका पर्दाफास भएका थिए।
हालसम्म कै ठूलो खोज भनिएकोले पन्डोरा पेपर्सले पनि यस विषयमा थप खुलासा गर्ने अनुमान गरिएको छ।