सरकारले विश्वविद्यालयको परीक्षामा सहभागी हुने २० वर्षमाथिका विद्यार्थीलाई परिचयपत्रका आधारमा कोभिड–१९ विरुद्धको खोप दिने निर्णय गरेको छ ।
स्वास्थ्य राज्य मन्त्री उमेश श्रेष्ठले विश्वविद्यालयका परीक्षार्थीका लागि काठमाडौंमा मात्र नभई सबै प्रदेशबाट कोभिशिल्ड वा भेरोसेलको खोप उपलब्ध गराउने निर्णय भएको बताएका हुन् । उनले प्रदेशले तोकेका खोपकेन्द्रबाट प्रवेशपत्र देखाएर खोप लिन सक्ने बताएका छन् ।
उनले भनेका छन् 'विश्वविद्यालय तहका परीक्षार्थीहरूले प्रवेशपत्रका आधारमा काठमाडौँ उपत्यकामा नेपाली सेना,नेपाल प्रहरी तथा सशस्त्र प्रहरी अस्पताल र चक्रपथस्थित राधास्वामी आइसोलेसन केन्द्रमा कोभिड–१९ विरुद्ध खोप प्राप्त गर्न सक्नुहुन्छ। यसबाहेक सबै प्रदेशबाट परीक्षार्थीहरूलाई खोप वितरणको व्यवस्था छ।'
स्वास्थ्य मन्त्रालयले ७ वटा प्रदेशको स्वास्थ्य निर्देशनालय र ७७ वटै जिल्ला स्वास्थ्य कार्यालयलाई प्रवेश पत्रको आधारमा खोप दिन पत्राचार गरेको छ।
