शिक्षामा माफियाकरण : कालोसूचीमा परेको लिंकन विश्वविद्यालयको सम्बन्धनमा विद्यार्थीमाथि ठगी

बिजपाटी संवाददाता

बिजपाटी संवाददाता

Aug 17, 2022 | 04:12:29 PM मा प्रकाशित

laxmi  sunrise bank

मलेसियाको राजधानी क्वालालम्पुरबाट दश किलोमिटर पश्चिम पेतालिङ जयामा रहेको लिंकन युनिभर्सिटी कलेज एउटा डिपार्टमेन्टल स्टोरले ओगट्ने आकारको भवनमा सञ्चालन भइरहेको छ । जबकी त्यही लिंकन युनिभर्सिटीबाट सम्बन्धन प्राप्त नेपालका कलेजहरू त्यो भन्दा भव्य र आलिसान भवनमा चलिरहेका छन् ।

विदेशी विश्वविद्यालयको सम्बन्धनमा नेपालमा संचालित ८६ कलेजमध्ये १२ (मन्त्रालयले पछिल्लो पटक स्वीकृति दिएको स्विचिङको तथ्यांक आइनसकेको) कलेजहरू मलेसियाको एउटा सामान्य ६/८ कोठे फ्ल्याटमा चलिरहेको र सन् २०११ मा मात्र कलेजबाट युनिभर्सिटीमा अपग्रेड भएको संस्थासँग सम्बन्धित छन् ।  

रोचक कुरा त के छ भने पार्किङसमेत नभएको लिंकन युनिभर्सिटीले आफ्नो विज्ञापन भने अर्कै भव्य भवन देखाएर गरिरहेको छ । केही महिनाअघि लिंकनले गरेको कार्यक्रममा नेपालबाट मलेसिया घुम्न गएका एक व्यक्तिले बिजपाटीलाई लिंकन विश्वविद्यालयको तस्वीर उपलब्ध गराएका छन् ।

विश्वविद्यालयको वास्तविक तस्विर

बिजपाटीले शुरूमा लिंकनबारे समाचार लेखिसकेपछि सम्पर्कमा आएका लिंकनबाटै सम्बन्धन प्राप्त टेक्सास इन्टरनेसनल कलेजका प्रिन्सिपल भेषराज पोखरेलले भनेका थिए, 'लिंकन मलेसियाकै भव्य विश्वविद्यालय हो । भवन उस्तै छ । विश्वकै टप लेवलको विश्वविद्यालयलाई तपाईंले फ्ल्याटमा संचालित भनेर समाचार लेख्नु हुँदैन ।'

तर त्यहाँको वास्तविकता भने पोखरेलले बताएको जस्तो छैन । पेतालिङ जया स्ट्रीटको एउटा सामान्य भवन जसको आकार एउटा मध्यमस्तरीय डिपार्टमेन्टल स्टोर जति पनि छैन, त्यसमा पोखरेलले दाबी गरेको विश्वकै भव्य विश्वविद्यालय संचालित छ । बिजपाटीलाई प्राप्त तस्वीरले पोखरेलको झुट बाहिर ल्याएको छ ।

प्रचार गर्न प्रयोग गरिएको झुटो तस्विर

लिंकन विश्वमा संचालित ३० हजार विश्वविद्यालयमध्ये ४ हजार ६ तहमा पर्छ । विश्वविद्यालयलाई तहगत रूपमा छुट्याउने मिडल इस्ट टेक्निकल युनिभर्सिटीले लिंकनलाई ४ हजार ६ औं स्थानमा राखेको छ । जबकी लिंकनको सम्बन्धन प्राप्त नेपालका कलेज संचालकहरूले लिंकनलाई विश्वकै नम्बर वान विश्वविद्यालय हो भन्दै विद्यार्थीमाथि ठगी गरिरहेका छन् ।

सन् २०२० मा मलेसियाको राष्ट्रिय समाचार एजेन्सी बेरनामा (bernama.com) ले लिंकनले मलेसियाको शिक्षा मन्त्रालयको निर्देशन पालना नगरेको समाचार प्रकाशित गरेको थियो । त्यसयता मलेसियाको विश्वविद्यालय अनुदान आयोगले लिंकनलाई पटक-पटक निर्देशिका पालना गर्न चेतावनी दिँदै पत्राचार गरेको थियो ।

लिंकन मलेसियामा कालोसूचीमा परेको विश्वविद्यालय हो । मेडिसिन प्रोग्रामअन्तर्गत यसलाई त्यहाँको सरकारले कालोसूचीमा राखेको हो । तर, नेपालमा भने सम्बन्धनका नाममा लिंकनले राज गरिरहेको छ । कालोसूचीमा परेको विश्वविद्यालयको सम्बन्धनमा लिएर नेपालमा पढाउनेहरू भने आफूलाई विश्वस्तरीय शिक्षा दिन पाएकोमा झुटो गर्व गरिरहेका छन् ।

मलेसियामा अहिले जम्माजम्मी ९२ विश्वविद्यालयहरू छन् । तीमध्ये २० विश्वविद्यालयहरू सरकारी हुन् भने बाँकीमध्ये लिंकन ३८ औं नम्बरमा पर्छ । लिंकनको सम्बन्धन लिएर भारतमा संचालित दर्जनौं कलेजहरू कारवाहीमा परेका छन् । त्यही लिंकनको नाममा यहाँ संचालित 'गैर-कानूनी' कलेजहरूले भने विद्यार्थीलाई झुक्याउन सफल भएका छन् ।

लिंकनका नाममा नेपालमा चलेका १२ मध्ये अधिकांश कलेजहरूले विश्वविद्यालयको गुणस्तर होइन, तत्कालीन शिक्षामन्त्री चित्रलेखा यादवलाई आर्थिक प्रलोभनमा पारेर सम्बन्धन लिएका थिए । यादव मन्त्री हुँदा केही कलेजले लिंकनको सम्बन्धन पाउने पक्कापक्की भएपछि एकजना अर्कै कलेज संचालक पनि मलेसिया पुगेका थिए ।

आफ्नो नाम उल्लेख नगर्ने शर्तमा उनले बिजपाटीलाई भने, 'त्यहाँ भएको झुटको खेती देखेर मैले लिंकनको सम्बन्धन अस्वीकार गरेको हुँ । भन्ने एउटा कुरा थियो, त्यहाँ देखिएको अर्कै थियो । मलाई लिंकन युनिभर्सिटी एउटा किराना पसल जस्तो लाग्यो । विश्वविद्यालयले पूरा गर्नुपर्ने कुनै पनि मापदण्ड पूरा गरेको थिएन । अहिले पनि उस्तै छ ।' बिजपाटीको सम्पर्कमा आएका ती व्यक्ति अहिले आफ्नै कलेजमा पूर्वान्चल विश्वविद्यालयका कार्यक्रमहरू चलाउँछन् ।

लिंकनका नाममा चलेका कलेजहरूले नेपालस्थित छुट्टै च्याप्टर पनि गठन गरेका छन् जुन कानूनी रूपमा कहीं दर्ता छैन । शिक्षा मन्त्रालयलाई लिंकनका नाममा भइरहेको दादागिरी थाहा नभएको होइन । तर स्रोतहरूको दाबीलाई विश्वास गर्ने हो भने प्रत्येक शिक्षामन्त्रीहरूलाई लिंकनको तर्फबाट मोटो रकम भेटी पुग्ने गर्छ ।

'भेटी'का आडमा मन्त्रालयका कर्मचारी, मन्त्री र उच्चपदस्थ कर्मचारीहरूले विद्यार्थीको शैक्षिक भविष्यमाथि प्रश्न चिह्न उठ्ने बनाइरहेका छन् । मन्त्रालयले यस्ता बेथिति अन्त्य गर्ने भन्दै पटक-पटक समिति र आयोग बनाउने गर्छ । तर शैक्षिक माफियाहरूले दिने आर्थिक प्रलोभनका आधारमा न उचित मूल्यांकन भइरहेको छ, न त प्रतिवेदनहरू नै सार्वजनिक हुने गर्छन् ।  

यी हुन् लिंकनका नाममा नेपालमा गैरकानूनी रूपमा चलेका शिक्षण संस्थाहरू 

सेन्टर फर लिडरशिप एण्ड आन्टरप्रेनरशीप प्राइभेट लिमिटेड ललितपुर 

पोखरा लिंकल इन्टरनेसनल कलेज पोखरा 

फोनिक्स कलेज अफ म्यानेजमेन्ट काठमाडौँ 

नेपाल बिजनेश कलेज बिराटनगर

टेक्सास इन्टरनेसनल एजुकेसन नेटवर्क काठमाडौँ 

वेस्टर्न मेगा कलेज बुटवल 

लिंकन इन्टरनेसनल कलेज अफ म्यानेजमेन्ट काठमाडौँ 

इलाइट इन्स्टिच्युट अफ फाइनान्स एण्ड एकाउन्टेन्सी काठमाडौँ 

नेसनल कलेज अफ म्यानेजमेन्ट, टेक्निकल साइन्स काठमाडौँ 

ग्रीन पीस लिंकन कलेज इटहरी 

बाल्मिकी लिंकन कलेज झापा 

पाल्पा इन्टरनेसनल कलेज अफ म्यानेजमेन्ट पाल्पा 

 

 

Share Your Thoughts

Recent News

Main News

Close in 7


Bizpati.com © 2020. All Rights Reserved