शिक्षामन्त्री देवेन्द्र पौडेलले
विदेशी विश्वविद्यालयबाट सम्बन्धन लिएका कलेजहरूको कानूनी र अन्य अवस्थाबारे छलफल
गर्न जुटेका छन् ।
बिहीवार नेपालका विश्वविद्यालयका
उपकूलपतिसँग भेटघाट गर्ने कार्यक्रम रहेको छ भने आउने आइतवार उनले विदेशी सम्बन्धन
लिएर नेपालमा कलेज चलाइरहेका संचालकहरूसँग भेट्ने कार्यक्रम रहेको छ ।
बिजपाटीले विदेशबाट सम्बन्धन लिएका
कलेजहरूले गरेको बेथितिबारे निरन्तर समाचार प्रकाशित गरेपछि त्यही पढेर मन्त्री
पौडेल छलफलको तयारी गर्न लागेका हुन् ।
विदेशी मुद्रा अपचलन, विद्यार्थीको शैक्षिक भविष्यको जोखिम, कानूनको कार्यान्वयन, शिक्षामा माफियाकरण जस्ता धेरै विषयहरू बिजपाटीले निरन्तर आवाज उठाइरहेको छ ।
'सञ्चारमाध्यमहरूले निरन्तर आवाज उठाउन थालेपछि के रहेछ भनेर मन्त्रीज्यू अलिकति सिरियस हुनुभएको छ,' मन्त्रीको सचिवालयले बिजपाटीलाई भन्यो ।
आर्थिक प्रलोभनको आडमा विदेशी
सम्बन्धनवाला कलेजहरूले कानूनको गम्भीर उल्लङ्घन गर्ने गरेका छन् । विदेशमा हुँदै
नभएको विश्वविद्यालयका नाममा सर्टिफिकेट बाँड्ने देखि होटेल एसोसियसनको सम्बन्धन
भन्दै विद्यार्थी झुक्याउन सक्रिय कलेजहरू अहिले पनि निर्देशिकाअनुसार चलेका छैनन्
।
यो बेथितिमा कतिपय ठाउँमा मन्त्रीको
पनि संलग्नता देखिएको छ । कानूनले सम्बन्धन दिनै नमिल्ने कतिपय संरचनालाई मन्त्रीको
ठाडो तोकआदेशमा सम्बन्धन दिइने गरेको खुलासा बिजपाटीले गरिरहेको छ ।
'छलफल हुनु त राम्रो हो, तर नीति नियमको सही कार्यान्वयन हुनेमा भने
ढुक्क हुन सकिन्न,' शिक्षा मन्त्रालयका एक पूर्व कर्मचारीले भने ।
