भरतपुर महानगरपालिकाकी मेयर रेणु दाहालले पदबाट राजीनामा दिएकी छन् । आसन्न स्थानीय निर्वाचनमा भरतपुरबाटै मेयर उठ्ने तयारीमा रहेकी उनले आज राजीनामा बुझाएकी हुन् ।
सत्तारूढ गठबन्धनले भरतपुर माओवादी केन्द्रलाई दिने निर्णय गरेको थियो । माओवादी केन्द्रका अध्यक्ष पुष्पकमल दाहाल 'प्रचण्ड'की छोरीसमेत रहेकी रेणु पुनः मेयरमा उठ्ने तयारी गरेकी छन् ।
बीरगंजका मेयर विजय सरावगीले पनि राजीनामा दिएका छन् । तत्कालीन संघीय समाजवादी फोरमबाट बीरगंजको मेयर बनेका सरावगी एमाले प्रवेश गरेका छन् । उनी पनि एमालेकै तर्फबाट बीरगंजको मेयर लड्ने तयारीमा छन् ।
निर्वाचन आयोगले स्थानीय निर्वाचनमा उम्मेदवार हुन पदाधिकारीबाट राजीनामा दिनुपर्ने निर्णय गरेको थियो ।
