निर्वाचन आयोगको टोलीले स्याङ्जा २
मा २५ जना मृत्यु भएको र १ सय २५ जना विदेशमा भएकाको मत परेको भन्दै बुझाएको
प्रतिवेदनविपरित आयोगले मतगणना गर्न निर्देशन दिएको छ ।
मृतक र विदेशमा भएकाहरूको मत परेको भएपनि
पुनः मतदान गर्न नसकिने भन्दै विवादित निर्णय गरेपछि स्याङ्जा २ मा मतगणना शुरू
भएको हो । पछिल्लो समयसम्म त्यहाँ नेपाली कांग्रेसका धनराज गुरुङले ३ हजार ९०१ मत
ल्याएका छन् भने नेकपा एमालेकी पद्मा अर्यालले ३ हजार २७४ मत ल्याएकी छन् ।
स्याङ्जा र बाजुरामा कांग्रेस र
एमालेले एकअर्कामाथि बुथ कब्जाको आरोप लगाउँदै आएका छन् । विवाद जिल्ला तहमा सुल्झन नसकेर निर्णयका लागि आयोगमा आइपुगेको थियो ।
एमाले र कांग्रेसले उजुरी दिएपछि छानबिन गर्न आयोगले दुवै जिल्लामा सहसचिवको नेतृत्वमा टोली पठाएको थियो । टोलीले मंगलबार बुझाएको प्रतिवेदनमा मृत्यु भएका र विदेशमा रहेकाका नाममा खसेको मतसंख्या उल्लेख गरे पनि कहाँ कतिले मतदान गरे भनेर विस्तृत खुलाएको छैन । ‘एकमुष्ट संख्या उल्लेख भएको प्रतिवेदन आएको छ,’
आयोग स्रोतले भन्यो ।
स्याङ्जा र बाजुराको विवादका विषयमा
निर्णय गर्न आयोगले मंगलबार गरेको बैठकमा पदाधिकारीबीच नै मत बाझिएको थियो । दुवै जिल्लामा पुनः निर्वाचन गर्ने कानुनी आधार नदेखिएको र अध्ययन टोलीले समेत कुनै प्रमाण पेस नगरेको हुनाले मतगणनाको निर्णय भएको प्रमुख निर्वाचन आयुक्त दिनेश थपलियाले बताए ।
‘निर्वाचनमा कमजोरी भए निर्वाचन अधिकृतको कार्यालय र मुख्य निर्वाचन अधिकृतको कार्यालयबाट लेखेर पठाउनुपर्ने हुन्छ,
पुनः मतदानका लागि त्यो पहिलो आधार हो,’ उनले भने, ‘सुरक्षा निकाय, निर्वाचन
अधिकृत र मतदान अधिकृतले सामान्य झडप मात्रै भएको भनेका छन् ।’
प्रमुख आयुक्त थपलियाका अनुसार
राजनीतिक दलका प्रतिनिधिले पनि सफलतापूर्वक मतदान भएको मुचुल्कामा हस्ताक्षर गरेका
छन् । ‘मतपेटिका राखेको ठाउँमा दलपिच्छे ताल्चा लगाइएको छ । विवाद भएको ठाउँको मतपेटिका फरक कोठामा राख्न मागसमेत भएको छैन । निर्वाचन शंकास्पद
थियो भने छुट्टै कोठामा राख्न माग गर्नुपर्थ्यो । अनि के आधारमा पुनः निर्वाचन गर्ने ?’ उनले
भने ।
निर्वाचनमा सुरुदेखि अन्त्यसम्म दलका प्रतिनिधिको सहमति देखिएको थपलियाले बताए । ‘स्याङ्जामा पितृले भोट हाल्यो भन्ने विषय छ । मरेको र विदेशमा छ भने कर्मचारीलाई थाहा नहुन सक्छ । राजनीतिक दलका प्रतिनिधिले पहिचान गरेर पठाएपछि मात्रै मत हाल्छन् । दलको प्रतिनिधिले अर्काका नाममा र मरेको व्यक्तिका नाममा समेत मत हाल्न लगाएको गुनासो गरे निर्वाचन कसुरअनुसार तत्काल कारबाही हुन सक्थ्यो ।’
प्रमुख निर्वाचन आयुक्त थपलियाले
मृत्यु भइसकेका र विदेशमा रहेका व्यक्तिका नाममा मतदान गराउने घटनाको जिम्मेवारी
सम्बन्धित दल र उम्मेदवारले लिनुपर्ने बताए । लोकतन्त्रको अभ्यास गर्ने दल र उम्मेदवारले मृत्यु भइसकेका र विदेशमा रहेका व्यक्तिका नाममा मतदान गराउँछन् भनेर अनुमान लगाउन नसकिने उनको भनाइ
छ । ‘त्यस्तो भए त्यही दल र उम्मेदवार जिम्मेवार हुनुपर्छ,’ उनले
भने ।
अन्तिम मतदाता नामावली सार्वजनिक गर्नुअघि केन्द्रदेखि स्थानीय तहका दलहरूसँग परामर्श गरिने हुनाले आयोगले मृत्यु भइसकेका व्यक्तिको नाम राख्यो भनेर आरोप लगाउन नमिल्ने उनले बताए ।
