विद्युत नियमन आयोगले माई खोला हाइड्रोपावर लिमिटेडलाई हकप्रद शेयर निष्काशन गर्न स्वीकृति प्रदान गरेको छ। आयोगको हालैको निर्णय अनुसार कम्पनीले १ बराबर १ अनुपातमा हकप्रद शेयर जारी गर्न पाउने भएको हो।
यस अनुसार कम्पनीले हाल कायम रहेको पूँजीअनुसार कुल ३९ लाख २१ हजार ५६८ कित्ता हकप्रद शेयर निष्काशन गर्नेछ। प्रतिकित्ता १०० रुपैयाँ अंकित मूल्यका आधारमा यस हकप्रद शेयरबाट कम्पनीले कुल ३९ करोड २१ लाख ५६ हजार ८०० रुपैयाँ बराबरको पूँजी संकलन गर्ने लक्ष्य लिएको छ।
माई खोला हाइड्रोपावरले यसअघि निर्माण सम्पन्न गरेका आयोजना सञ्चालनमा रहेका छन् भने भविष्यमा थप विस्तारका लागि पूँजी जुटाउन हकप्रद निष्काशन गर्न लागेको कम्पनी स्रोतले जनाएको छ। हकप्रद निष्काशनबाट संकलन हुने रकम कम्पनीले सञ्चालनमा रहेका आयोजना सुदृढीकरण, ऋण भुक्तानी तथा सम्भावित नयाँ आयोजनामा लगानीका लागि प्रयोग गर्ने बताइएको छ।
कम्पनीले यसअघि सर्वसाधारणका लागि प्राथमिक शेयर निष्काशन (आईपीओ) जारी गरी पूँजी संकलन गरिसकेको थियो। हकप्रद शेयर जारी गरेपछि कम्पनीको चुक्ता पूँजी दोब्बर हुने छ।
अब कम्पनीले नियामकबाट स्वीकृति प्राप्त गरेपछि नेपाल धितोपत्र बोर्ड (सेबोन) मा आवश्यक प्रक्रिया अगाडि बढाउनेछ। सेबोनबाट स्वीकृति प्राप्त भएपछि मात्र हकप्रद शेयर निष्काशन मिति सार्वजनिक हुनेछ।
.gif)
.gif)
