स्पेनलाई पेनाल्टी सुट आउटमा पराजित गर्दै इटाली युरो २०२० को फाइनलमा प्रवेश गरेको छ । स्पेनलाई पेनाल्टीमा ४–२ ले पराजित गर्दै इटाली २०१२ पछि पहिलो पटक युरो कपको फाइनलमा पुगेको हो ।
पहिलो हाफ गोलरहित बराबरीमा सकिएको खेलको दोस्रो हाफको ६०औं मिनेटमा फेड्रिको किएसाले गोल गर्दै इटालीलाई अग्रता दिलाए । तर ६२औं मिनेटमा मैदान प्रवेश गरेका अल्भारो मोराटाले बराबरी गोल फर्काए ।
निर्धारित समयमा १–१ गोलको बराबरी भएपछि खेल अतिरिक्त समयमा धकेलिएको थियो । अतिरिक्त समयमा थप गोल हुन सकेन । त्यसपछि पेनाल्टी सुट आउटमा पुगेको खेलमा इटाली विजयी भयो ।
इटालीले अब फाइनलमा इंग्ल्यान्ड र डेनमार्कबीच हुने दोस्रो सेमिफाइनलको विजेतासँग खेल्नेछ । यो खेल बुधबार हुनेछ ।
सन् १९६८ मा युरो च्याम्पियनसिपको उपाधि जितेको इटाली सन् २००० र २०१२ मा फाइनल पुगेको थियो ।
स्पेन भने सन् १९५४ मा पहिलो पटक युरो च्याम्पियन बनेको थियो । २००८ र २०१२ को समेत विजेता स्पेन २०१६ मा पनि इटालीसँग पराजित हुँदै क्वार्टरफाइनलबाट बाहिरिएको थियो ।