नागरिक लगानी कोषको पेन्सन योजनामा पुष महिनाको अन्तिम सातादेखि मात्र अनलाइनबाट सहभागी हुन सकिने भएको छ । यसअघि कोषले पुषको पहिलो सातादेखि नै अनलाइन प्रणालीको विकास गरिसक्ने जनाएको भए पनि तोकिएको समयमा कार्य नसकिएको हो ।
अनलाइन सिस्टम बनाउने कम्पनीका कर्मचारीहरुलाई कोरोना संक्रमण भएपछि केहि समय धकेलिएको कोषका नायब कार्यकारी निर्देशक डा. ईन्द्र कुमार कट्टेलले जानकारी दिएका छन् । कोषले उक्त सिस्टम बनाउन ईन्फो डेभलपर्सलाई जिम्मा दिएको जनाएको छ ।
उक्त सिस्टम निर्माणको अन्तिम चरणमा पुगेकाले पुष महिनाको अन्तिम सातादेखि भने पेन्सन योजनामा अनलाइनबाट नै सहभागी जनाउन सकिने नायब कार्यकारी निर्देशक कट्टेलले बिजपाटीलाई जानकारी दिएका छन् ।
कोषले गत भदौ देखि बचत गर्दा पेन्सन पाईने योजना ल्याएको थियो । जसमा कुनैपनि व्यक्तिले १५ वर्षसम्म रकम जम्मा गरेमा पेन्सन पाउनेछ। यसरी जम्मा गरेको व्यक्तिले आँफु ६० वर्ष नाघेपछि पेन्सन पाउनेगरी कोषले यस योजनाको सुरुवात गरेको हो ।
यो पनि : नागरिक लगानी कोषको पेन्सन योजनामा कसरी हुने सहभागी , के पाइन्छ सुविधा ?