कोरोना भाइरसको संक्रमणलाई प्रवेश नदिन सर्वोच्च अदालतले आवश्यकता अनुसार अन्तराष्ट्रिय उडान स्थगित गर्न आदेश दिएपछि उड्डयन क्षेत्रमा चर्चा सुरु भएको छ । ‘कोभिड–१९’ अर्थात् कोरोना भाइरसका कारण हालसम्म विश्वका ५० भन्दा बढी मुलुक प्रभावित भइसकेका छन् ।
कति देशका उडान रोकिने ?
कोरोनाको संक्रमणलाई ध्यानमा राखेर अन्तराष्ट्रिय उडान रोक्न माग गर्दै अधिवक्ता पूर्ण राजवंशीले दायर गरेको रिटमा सुनुवाइ गर्दै सर्वाेच्चका न्यायाधिश तेजबहादुर केसीको एकल इजलासले आइतबार उडान रोक्न निर्देशन दिएको हो । सर्वोच्चले चीन, जापान, दक्षिण कोरिया, बहराइन र इरानबाट सोझै र ट्रान्जिट भएर काठमाडौँस्थित त्रिभुवन अन्तराष्ट्रिय विमानस्थलमा अवतरण हुने उडान केही समयका लागि रोक लगाउन आदेश जारी गरेको हो ।
नेपालको संविधानको धारा १६(१) (३०) (३५) द्वारा प्रदत्त मौलिक हक र संक्रामक रोग ऐन २०२० को दफा २ को आधारमा जोखिम विश्लेषण, मूल्यांकन, विपद् रोकथाम र नियन्त्रण गर्न सर्वोच्चले आदेश दिएको हो ।
कहिलेसम्म रोकिन्छन् उडान ?
उड्डयन क्षेत्रको सञ्चालक र नियामक निकाय नेपाल नागरिक उड्डयन प्राधिकरणले सर्वोच्च अदालतको आदेश आइनपुगेको जनाएको छ । प्राधिकरणका प्रवक्तासमेत रहेका उप–महानिर्देशक राज कुमार क्षेत्रीका अनुसार सर्वोच्चको आदेश संस्कृति, पर्यटन तथा नागरिक उड्डयन मन्त्रालयमार्फत प्राधिकरणमा आउँछ ।
‘अदालतको आदेश मन्त्रालयमार्फत आउने हो’ उनले भने, ‘प्राधिकरणमा आदेश आइपुगेपछि हामी कार्यान्वयनमा जान्छौँ ।’
प्राधिकरणका महानिर्देशक राजन पोखरेलले पनि सर्वोच्चको आदेश आइपुगेपछि आदेशमा भने अनुसार निर्णय लिने बताएका छन् । उनका अनुसार आदेश मन्त्रालयमा आइपुगेको छ ।
तर मन्त्रालयले भने अझै आदेश आइनसकेको बताएको छ । मन्त्रालयका प्रवक्ता एवम् सह–सचिव रुद्रसिंह तामाङ आदेश प्रमाणित भएर आउनुपर्ने भएकाले केही समय लाग्ने बताउँछन् ।
‘आदेशमा इजलासका न्यायधिशले हस्ताक्षर गरेपछि प्रधानन्यायधिशले हस्ताक्षर गरेर प्रमाणित गरेपछि मात्रै मन्त्रालयमा आउँछ’, उनले भने, ‘आज भोलीमा आइपुग्छ होला, आउनासाथ हामी प्राधिकरणमा पठाउँछौँ ।’
.gif)
.gif)
