धनगढी/स्थानीय तह निर्वाचन ताका सरकारी
सुविधा एक पैसा पनि नलिने उद्घोष गरी चुनाव जितेका धनगढी उपमहानगरपालिकाका मेयर
गोपाल हमालले तलब बुझेका छन् । तर, उनले
बुझेको तलब आफ्नो व्यक्तिगत कार्यमा भन्दा परोपकारी कार्यमा खर्च गरेका छन् ।
मेयर हमालले ३ महिनाको सेवा सुविधा
बापत पाउने रकम सामाजिक कार्यमा लगाउने घोषणा गरेका हुन् । उनले साउन, भदौ, असोज र
पर्व खर्चबापत २ लाख ६७ हजार ८ सय रुपैयाँ बुझेका छन् ।
सो रकमबाट धनगढीमा रहेका विभिन्न
विद्यालयमा अध्ययनरत विद्यार्थी तथा सामाजिक संस्थाहरूमा आश्रित २६९ जनालाई पोसाक
किनिदिने हमालले बताएका छन् ।
मेयर हमालले दक्षिणकाली आधारभूत
बहिरा विद्यालय बेलाका १ सय ५ जना विद्यार्थी, दृष्टि फाउन्डेसनका ५५ जना आश्रितहरू, मानव सेवा आश्रममा रहेका ५६ जना, आमाको माया छात्रावासमा रहेका ३० जना, गेटा अपाङ्ग समाजका ५ जना र पञ्चोदय माध्यमिक विद्यालयमा अध्ययनरत १८ जना दृष्टिविहीन
विद्यार्थीलाई पोसाक किनिदिने बताए ।
उनले चुनावका बेला नै आफू निर्वाचित
भइसकेपछि कुनै सेवा सुविधा नलिने घोषणा गरे अनुरूप नै बाचा पुरा गरेको बताए ।
मेयर गोपाल हमालले ७९ हजार ६ सयका
दरले साउन, भदौ र असोजको सेवासुवाधा र २९ हजार
पर्व खर्च गरी २ लाख ६७ हजार ८ सय बुझेको जानकारी दिए ।
यसअघि मेयर हमालले असार महिनाको
सुविधा दक्षिणकाली बहिरा आधारभूत आवासीय विद्यालयलाई हस्तान्तरण गरेका थिए । उनले
उपमहानगरपालिकाको वडा नम्बर ११ मा रहेको बहिरा आधारभूत विद्यालयलाई असार महिनाको
सुविधाबापतको रकम ८१ हजार ५ सय ७६ रुपैयाँ हस्तान्तरण गरेका थिए ।
जेठ महिनाको २३ दिनको हुन आउने ५५ हजार ६८७ रुपैयाँ ८३ पैसा रकम धनगढी उपमहानगरपालिका वडा नम्बर ३ मा रहेको गौ संरक्षण सेवा समितिलाई हस्तान्तरण गरेका थिए । मेयर हमालले आफूले पाएको गाडी सुविधा पनि वडा स्वास्थ्य क्लिनिकका लागि भनेर स्वास्थ्य शाखालाई हस्तान्तरण गरिसकेका छन् ।
झलक दवाडी/ धनगढी
