बेलायतबाट नेपालमा आएका २ सय ३५ जना नागरिक निगरानीमा परेका छन् । पछिल्लो समय बेलायतमा नयाँ प्रकारको कोरोना भाइरस फेला परेपछि उक्त मुलुकबाट नेपाल भित्रिएकाहरुलाई स्वास्थ्य तथा जनसंख्या मन्त्रालयले निगरानी गरेको हो ।
स्वास्थ्य मन्त्रालयअन्तर्गत इन्सिडेन्ट कमान्ड सिस्टमको बैठकले नयाँ भाइरसको स्वरूप नेपालमा भित्रिएको बारे अध्ययन गर्नभन्दै पुस १ गतेदेखि ७ गतेसम्म बेलायतबाट नेपाल आएकाहरुलाई सम्पर्कमा आउन आग्रह गरेको थियो ।
मन्त्रालयको आग्रह अनुसार २ सय ३४ जना सम्पर्कमा आएको र १४ जना होटल क्यारेन्टिमा रहेको मन्त्रालयका प्रवक्ता जागेश्वर गौतमले जानकारी दिए । उनका अनुसार बेलायतमा नयाँ भाइरस संक्रमण देखिएसँगै बेलायतबाट हुने उडान र यात्रु आगमनलाई नेपालमा प्रतिबन्ध लगाइएको छ।
नेपाल नागरिक उड्डयन प्राधिकरणले गत बुधबार रातिदेखि लागू हुने गरी बेलायत र बेलायत ट्रान्जिट भएर आउने यात्रुलाई नल्याउन विभिन्न हवाई सेवालाई सर्कुलर गरेको थियो। बुधबार बिहान बेलायतबाट नेपाल आएका यात्रुलाई एक साताका लागि होटलमा राखिएको विमानस्थल कार्यालयले जनाएको छ ।
बेलायतबाट नेपाल भित्रिएकामध्ये केही व्यक्तिको स्वाब संकलन गरी जिन सिक्वेन्सिङद्वारा आनुवंशिक संरचनाको अध्ययन गर्न लागिएको मन्त्रालयले जनाएको छ ।
