औषधि उत्पादक संघको अधिवेशनको मिति टुंगो लागेसँगै नेतृत्वका आकांक्षी पनि सतहमा देखिएका छन् । साउन २९ गते शुक्रबार होटल मेरियटमा संघको निर्वाचन अधिवेशन हुँदैछ । अधिवेशनको मिति नजिकिएसँगै नयाँ नेतृत्वका लागि आफ्नो पक्षमा माहोल बनाउन आकांक्षीहरु लागेका छन् ।
औषधि उत्पादक संघका निवर्तमान अध्यक्ष दीपक दाहाल सहमतिमै नेतृत्व हस्तान्तरण हुने बताउँछन् ।
‘चुनाव गराउँदैनौँ, छलफल गरेर सहमतिमै नेतृत्व गर्न सक्ने साथीलाई संघको अध्यक्ष बनाउँछौँ’ निवर्तमान अध्यक्ष दाहालले भने ।
को को छन् दाबेदार ?
औषधि उत्पादक संघको अध्यक्ष बन्न आकांक्षी ३ जना छन् । यस अघिको निर्वाचनमा जि. नारायण बहादुर क्षेत्रीसँग अध्यक्षमा पराजित भएका प्रज्वलजंग पाण्डे मुख्य दाबेदार छन् । वरिष्ठ उपाध्यक्ष महेश प्रसाद प्रधान र महासचिव विप्लव अधिकारी पनि अध्यक्ष बन्ने दौडमा छन् ।
तर, उच्च स्रोतका अनुसार प्रज्वलजंग पाण्डेलाई यसपाली सहमतिमै अध्यक्ष बनाउने गृहकार्य थालिएको छ । अध्यक्ष क्षेत्रीले पनि सकेसम्म चुनाव हुन नदिने र सहमतिमै नेतृत्व हस्तान्तरण गर्ने आफ्नो प्रयास रहेको बताएका छन् ।
कसैले पनि नदोहोर्याउने अभ्यास
अध्यक्ष क्षेत्रीका अनुसार अहिले औषधि उत्पादक संघमा एक पटक अध्यक्ष भएपछि पुनः अध्यक्षमा दाबेदारी गर्ने ‘कल्चर’ हराउँदै गएको छ । सुरु सुरुमा थोरै सदस्य हुँदा १ मात्रै नभई ३ कार्यकालसम्म पनि एकै व्यक्ति अध्यक्ष भएको इतिहास रहेपनि अब भने सदस्यहरु पनि बढ्दै आएको र युवा पुस्ताहरु औषधि उद्योगमा आकर्षित भईरहेकाले संघमा एकै व्यक्तिले दोहोर्याएर नेतृत्वमा दाबी नगर्ने भन्ने संस्कृतिको विकास गर्न खोजिएको अध्यक्ष क्षेत्री बताउँछन् ।
तर, यो व्यवस्था विधानतः नभई काम गर्दै गएपछि स्थापित हुँदै जाने अभ्यास गर्न खोजिएको संघका पदाधिकारी पनि बताउँछन् ।
अहिले औषधि उत्पादक संघमा ६५ भन्दा बढी सदस्य छन् ।
